Polıtsııa elordada qylmys jıi tirkeletin oryndardy atady

ASTANA. KAZINFORM — Jyl basynan elordadaǵy 171 kóńil kóterý ornynda 357 qylmys jasalǵan. Bul týraly Senatta Qazaqstan kásipkerleriniń quqyqtaryn qorǵaý jónindegi ýákilmen kezdesý kezinde Іshki ister mınıstriniń orynbasary Sanjar Ádilov aıtty.

— Astanadaǵy jaǵdaı erekshe alańdatyp tur. Elordadaǵy 171 kóńil kóterý ornynda 357 qylmys jasaldy, olardyń kópshiligi túnde jáne tańerteń erte jasalǵan, - dedi S. Ádilov.

Onyń sózine qaraǵanda, oıyn-saýyq oryndarynyń ıeleri tıisti shara qabyldamaýynan mundaı oqıǵalar jıi qaıtalanady.

— 11 aı ishinde Astanada 3 431 shaqyrtý bolǵan, onyń 90 paıyzy saǵat 23:00-den keıin boldy. Bul shaqyrtýlardyń 958-i «Panaehalı» dámhanasynda, 349-y «Zaberı menıa» klýbynda jáne 262-si «Mıata» barynda tirkelgen. Qylmys jıi jasaldy. Máselen, Amazon-da bes qylmys boldy, onyń tórteýinde pyshaqtaǵan, sońǵysy ólimmen aıaqtaldy. Almatyǵa qatysty statıstıka da jaqsy emes. 3588 shaqyrtý tirkelip, 14-ten astam kisi óltirý deregi anyqtyldy, - dedi mınıstrdiń orynbasary.

Buǵan deıin habarlanǵandaı, Іshki ister mınıstri Erjan Sádenov kóńil kóterý oryndarynda ishimdik satý ýaqytyn shekteý qajet ekenin aıtty.