Polıtsııa Ekibastuzda tóbesi opyrylyp túsken saýda ortalyǵy boıynsha qylmystyq is qozǵady

PAVLODAR. KAZINFORM - Oqıǵanyń mán-jaıy men sebepteri tergeý barysynda anyqtalatyn bolady,-dep habarlady Pavlodar oblystyq polıtsııa departamentinen.

Ekibastuzda tóbesi oıylyp, ortasyna túsken «Maxi Mall» saýda – oıyn-saýyq ortalyǵyndaǵy oqıǵany tergeý jumystary bastaldy.

- Polıtsııa qaýipsizdik talaptaryna saı kelmeıtin jumystardy oryndaý nemese qyzmetter kórsetý deregi boıynsha qylmystyq is qozǵady. Oqıǵanyń mán-jaıy men sebepteri tergeý barysynda anyqtalatyn bolady, - dep málimdedi óńirlik polıtsııa departamentinen.

Eske sala keteıik, keshe tústen keıin Ekibastuzda «Maxi Mall» saýda ortalyǵynyń tóbesi opyrylyp tústi. Opyrylǵan jerdiń aýmaǵy shamamen 150 sharshy metr.

Tóbe konstrýktsııasynyń opyrylýynan 5 adam zardap shekken. Olardyń úsheýi bala ekeni anyqtaldy.

Zardap shekkenderdi aýrýhanaǵa jatqyzýdyń qajeti bolmaǵan. Dárigerler qarap, alǵan jaraqattaryna ambýlatorııalyq em taǵaıyndaldy.

Búgin óńirlik densaýlyq saqtaý basqarmasy oqıǵa kezinde taǵy bir balanyń zardap shekkenin habarlady.