Polıtsııa Bilim kúninde balalar qaýipsizdigin kúsheıtti
ASTANA. KAZINFORM — 1 qyrkúıekte elimizdiń barlyq óńirinde saqshylar jańa oqý jylynyń bastalýyna arnalǵan is-sharalar barysynda balalardyń qaýipsizdigi men qoǵamdyq tártipti qamtamasyz etti, dep habarlaıdy QR ІІM baspasóz qyzmeti.
Árbir bilim berý uıymyna polıtsııa qyzmetkerleri men aýmaqtyq bólimshelerdiń jaýapty basshylary bekitildi. Patrýldik polıtsııa jasaqtary mektepterde ótetin is-sharalar uıymdastyrylatyn oryndarǵa barynsha jaqyn boldy.
Bilim kúni balalarmen profılaktıkalyq jumys júrgizýge erekshe nazar aýdaryldy. Mektepterdegi saltanatty jıyndarda polıtsııa qyzmetkerleri oqýshylarǵa qaýipsiz júrip-turý, jol qozǵalysy erejelerin saqtaý jáne quqyq buzýshylyq jasaǵany úshin jaýapkershilik týraly eske saldy.
ІІM bólimsheleriniń basshylary men qyzmetkerleri elimizdiń barlyq óńirinde 7 myńnan astam dáris pen taqyryptyq áńgime ótkizdi. Bastaýysh synyp oqýshylary úshin jol qozǵalysy erejelerine arnalǵan arnaıy boıamaqtar ázirlenip, qaýipsizdik týraly bilimderin oıyn túrinde bekitýge múmkindik jasaldy.
— Profılaktıkalyq jumystarǵa jas jol ınspektorlary men «Jas saqshy» synyptarynyń oqýshylary da atsalysty. Búginde elimizdiń 238 mektebinde 264 «Jas saqshy» synyby jumys isteıdi. Onda 5,3 myńnan astam oqýshy bilim alýda. 1 qyrkúıekte Astana jáne Shymkent qalalarynda, Atyraý, Batys Qazaqstan, Qaraǵandy, Qostanaı, Mańǵystaý oblystary men Jetisý oblysynda taǵy 10 osyndaı synyp ashyldy, — deıdi tártip saqshylary.
«Jas saqshy» synyptarynyń oqýshylary polıtsııa qyzmetkerlerimen birge óz qatarlastary arasynda profılaktıkalyq jumystar júrgizip, taqyryptyq is-sharalarǵa qatysady. Sondaı-aq oqýshylardyń zańǵa baǵyný jáne qaýipsiz minez-qulyq mádenıetin qalyptastyrýǵa úles qosady.
ІІM balalardyń qaýipsizdigin mektepterde de, olardyń aýmaǵynan tys jerlerde de qamtamasyz etý boıynsha júıeli jumysty jalǵastyrady. Óskeleń urpaqtyń ómiri men densaýlyǵyn qorǵaý ishki ister organdary qyzmetiniń basym baǵyttarynyń biri bolyp qala beredi.
Budan buryn BQO-da úsh jyl buryn ashylǵan mektep ǵımaraty qaıtadan jóndeýge jabylǵanyn jazǵanbyz.
