Polıtsııa beketindegi qaıǵyly oqıǵa: mınıstrlik isti tergeýdiń mán-jaıyn málimdedi

ASTANA. KAZINFORM — Іshki ister mınıstriniń orynbasary Sanjar Ádilov Qaraǵandyda polıtsııa pýnktinde áıel adamnyń máıitiniń tabylýy oqıǵasyn tergeý isine qatysty túsinik berdi. 

— Qaraǵandydaǵy oqıǵa boıynsha tergeý amaldary jalǵasyp jatyr. Bul jumysty QR ІІM Ózindik qaýipsizdik departamenti júzege asyryp otyr. Qylmystyq is boıynsha birqatar sot-medıtsınalyq saraptama júrgiziledi. Onyń qorytyndysyn alǵannan keıin, tergeý nátıjesi men áıeldiń ólimine qatysty tolyq aqparat jarııalanady, — dedi Sanjar Ádilov Parlament Májilisinde tilshiler suraǵyna jaýap bere otyryp.

Onyń aıtýynsha, oqıǵa ornynda bolǵan polıtseıge qatysty qorǵanýǵa quqyǵy bar kýáger mártebesi berildi.

— Іs boıynsha aıǵaqtardy jınaqtaý júrip jatyr, — dedi mınıstrdiń orynbasary.

Eske salsaq, qyrkúıek aıynyń aıaǵynda Qaraǵandyda polıtsııanyń bir tirek pýnktinde áıel adamnyń máıiti tabylǵanyn jazǵan edik. 

Oqıǵa ornynda es-tússiz jatqan polıtseı qyzmetkeri de bolǵan. Ol dereý medıtsınalyq mekemege jetkizildi.

Al qazan aıynda Qaraǵandy qalasyndaǵy Mıhaılov polıtsııa bóliminiń tirek pýnktinde áıeldiń máıiti tabylýyna baılanysty qyzmettik tergeý júrgizildi. Nátıjesinde, birneshe basshy qyzmetinen bosatyldy.