Polıtsııa bedeline nuqsan keltirdi: Ádilethan Moldahanǵa taǵylǵan aıyptar jarııa etildi
ALMATY. KAZINFORM — Almaly aýdandyq sotynda zańger ári bloger Ádilethan Moldahanǵa qatysty sot otyrysy ótip jatyr.
Oǵan QR Qylmystyq Kodeksi 274-baby 2-tarmaǵy 3-bóligi boıynsha (kórineý jalǵan aqparat taratý) aıyp taǵyldy. Іs boıynsha jábirlenýshi retinde Almaty qalasy polıtsııa departamenti basshysynyń burynǵy orynbasary Erjan Uzabaev jáne Almaty qalasy polıtsııa departamenti Ákimshilik polıtsııa basqarmasynyń burynǵy basshysy Serik Shýmaev tanyldy.
Sot otyrysynyń basynda tóraǵalyq etýshi sýdıa Ernar Qasymbekov aıyptalýshy taraptyń isti qysqartylǵan tárippen ótkizý týraly ótinishinen prokýratýra bas tartqanyn aıtty.
Odan keıin Serik Shýmaevtyń advokaty Jandos Palmanov aıyptalýshyǵa moraldyq shyǵyn retinde 10 mln teńge jáne sot shyǵyndaryna 1 mln teńge azamattyq talap-aryz qoıdy. Ol óz qorǵaýyndaǵy azamattyń kásibı bedeline nuqsan kelgenin aıtty.
Taraptardyń ótinishteri aıtylǵan soń, sot otyrysynda prokýror Uljan Ábdiramanova aıyptaý aktisin oqydy. Onda Ádilethan Moldahan áleýmettik jelidegi paraqshasynda qaraýshylardy kóbeıtý maqsatynda rezonans týdyratyn beınerolıkter engizip otyrǵany aıtyldy. Memlekettik aıyptaýshy Moldahan Instagram jelisinde 2026 jyldyń 21 naýryzynda bolǵan jol apaty boıynsha jaǵymsyz derekter aıta otyryp, polıtsııa qyzmetkerleri týraly teris pikir qalyptastyrǵanyn atap ótti. Onyń ishinde Almaty qalasy polıtsııa departamenti basshysynyń orynbasary Erjan Uzabaev jáne Ákimshilik polıtsııa basqarmasynyń basshysy Serik Shýmaevtyń quqyqtaryna nuqsan kelgenin málimdedi.
— Aıyptalýshy Almaty qalasy polıtsııa departamenti basshysynyń orynbasary Erjan Uzabaev jáne Ákimshilik polıtsııa basqarmasynyń basshysy Serik Shýmaev týraly eshqandaı dáleldemesiz bızneste yqpaldy azamattardyń balalaryna qamqorshylyq tanytqany týraly beınejazba taratqan, — dedi prokýror.
Eske salaıyq, ótken sot otyrysynda aıyptalýshy Ádilethan Moldahan óz kinásin tolyq moıyndap, isti qysqartylǵan tártipte ótkizýge ótinish jasady.
Al jábirlenýshi Uzabaevtyń advokaty Asylbek Ábdiraıymov moraldyq shyǵyn retinde 10 mln teńge jáne sot shyǵyndaryna 1 mln teńge azamattyq talap-aryz qoıǵan edi.
Buǵan deıin Almatyda 1 mıllıonnan astam oqyrmany bar bloger Ádilethan Moldahan ustalǵanyn jazǵanbyz.
Ol áleýmettik jelide quqyqtyq saladaǵy beınejazbalarymen tanymal. Ásirese, onyń Ál-Farabı dańǵylynda bolǵan jol apaty jaıly jarııalaǵan beınejazbalary jelide keńinen tarady.
Sot qaýlysymen oǵan 10 táýlik merzimge qamaýda ustaý túrindegi bultartpaý sharasy qoldanylǵan bolatyn.
Keıin Ádilethan Moldahandy qamaýda ustaý merzimi 2 aıǵa uzartyldy.
