Polıtsııa bastyǵynyń qyzymyn: Jelide dóreki minez kórsetken qyzdyń vıdeosy tarady

ALMATY. KAZINFORM — Áleýmettik jelide kóshede dóreki minez kórsetken qyzdyń vıdeosy tarady.

Beınejazbadan qyz ben jigittiń kóshede júrgenin kórýge bolady.

Bir kezde boıjetken ákesi Qarasaı aýdanynyń basshysy ekenin aıtyp, aıǵaılaı bastaıdy.  

«Sen meniń ákemniń kim ekenin bilesiń be? Qarasaı aýdanynyń bastyǵy. Aýdandyq ishki ister basqarmasy», — dep baqyrdy ol vıdeony túsirip turǵan adamǵa. 

Almaty oblystyq polıtsııa departamenti vıdeodaǵy jaıtqa túsinik berdi.

«Bul jaǵdaı Almaty oblysy aýmaǵynda bolǵan joq. Sonymen qatar, beınejazbadaǵy qyzdyń sózderi shyndyqqa janaspaıdy. Ol aýdandyq polıtsııa basqarmasy bastyǵynyń qyzy emes, onyń balalarynyń eń úlkeni nebári 7 jasta», — dedi Almaty oblysy PD bólim basshysy Ernar Saıdıldın.

Belgili bolǵandaı, vıdeo Almaty kósheleriniń birinde túsirilgen.

«Almaly aýdandyq polıtsııa basqarmasynyń qyzmetkerleri quqyq buzýshylarǵa QR zańnamasyna sáıkes shara qabyldady. Olarǵa qatysty qoǵamdyq orynda mas kúıinde júrý jáne tynyshtyqty buzý derekteri boıynsha ákimshilik materıaldar jınaldy. Mas er adam medıtsınalyq aıyqtyrǵyshqa jetkizildi», — dep habarlady Almaty polıtsııa departamentiniń baspasóz qyzmetinen.