Polıtsııa avtobýsta kámpıtke qaqalǵan sábıdiń ómirin saqtap qaldy
ASTANA. KAZINFORM — Oqıǵa Astanada qalalyq marshrýttyq avtobýsta bolǵan. Jolda kele jatqan kezde balalar arbasynda otyrǵan sábı kenetten kámpıtke qaqalyp, tynys ala almaı qalǵan. Bul týraly Polisia.kz jazdy.
Jolaýshylardyń biri jaǵdaıdy baıqap, dereý kómekke umtyldy. Ol balany qolyna alyp, eńkeıtip, tynys jolyn ashýǵa baǵyttalǵan alǵashqy kómek tásilderin qoldandy. Kóp uzamaı sábıdiń tynys alýy qalpyna keldi.
Balanyń ómirine qaýip tóngen sátte kásibı daǵdysy men alǵashqy kómek kórsetý tájirıbesin durys qoldanǵan azamat — Astana qalasy PD jyldam qımyldaıtyn arnaıy jasaq qyzmetkeri Álisher Jarqymbekov bolyp shyqty.
JQAJ jaýyngeriniń bul áreketi qyzmettik mindetten tys ýaqytta da adam ómirine jaýapkershilikpen qaraýdyń naqty úlgisi boldy.
Eske sala keteıik, buǵan deıin SQO-da jylqy súıegine qaqalǵan er adam ólim aýzynan qalǵanyn jazǵan edik.
