Polıtsııa áskerge shaqyrylǵandardy májbúrlep jetkizýge quqyly – Qorǵanys mınıstrligi
ASTANA. KAZINFORM – Qorǵanys mınıstrligi kámelet jasyna tolǵan azamattardyń áskerı mindetin óteý tártibin taǵy da túsindirdi.
«Buqaralyq aqparat quraldary men áleýmettik jelilerde jastardy eriksiz ustap alyp, jergilikti áskerı basqarý organdaryna jetkizip jatqan beınematerıaldar taratylýda. Shaqyrý naýqandary barysynda keıbir azamattardyń áskerı qyzmetten jaltaryp, jergilikti áskerı basqarý organdaryna ýaqytyly kelmeý faktileri baıqalady. Sonymen qatar áskerge shaqyrý jasyndaǵy azamattardy esepke alýda da qıyndyqtar týyndaıdy. Óıtkeni, kópshiligi tirkelgen jerinde turmaıdy. Al qonys aýdarǵan jaǵdaıda jańa turǵylyqty mekenjaıyna tirkelmeıdi», - dep túsindirdi mınıstrlikten.
Áskerge shaqyrý qaǵazy kámelet jasyna (18 jas) tolǵandardyń qolyna beriledi, al olardyń áskerı bólimge jetkizý jaǵy ishki ister organdaryna júkteledi.
«Reıd kezinde keıbir azamattar ishki ister organdary qyzmetkerleriniń zańdy talaptaryna baǵynbaı, qarsylyq kórsetip jatady. Mundaı jaǵdaıda polıtsııa qyzmetkerleri olardy májbúrli túrde ustap, shaqyrý pýnktine jetkizýdi júzege asyrýǵa quqyly. Shaqyrý komıssııasy jetkizilgen ásker jasyndaǵy azamattardyń mártebesin sol jerde anyqtaıdy. Merzimdi áskerı qyzmetke shaqyrýǵa negiz bolmaǵan jaǵdaıda olardy bosatady. Al shaqyrýǵa negiz bolsa, medıtsınalyq komıssııadan ótýge jáne shaqyrý sheńberindegi basqa da is-sharalardy ótkizýge jiberedi», - deıdi vedomstvodan.
Eske salsaq, Qorǵanys mınıstrligi buǵan deıin de jasóspirimdi áskerge kósheden eriksiz alyp ketýge qatysty málimdeme jasaǵan edi.
Sondaı-aq, áskerge kósheden eriksiz alyp ketse, sotqa berýge bola ma degen máseleni kótergen edik.
