Polıtsııa arnaıy reıd barysynda jalǵan nómir taqqan 500-den astam kólikti anyqtady
ASTANA. KAZINFORM – 10-14 maýsym aralyǵynda ishki ister organdary jalǵan memlekettik tirkeý nómirlik belgilerin paıdalanatyn kólik quraldaryn anyqtaý jáne osyndaı derekterdiń jolyn kesý boıynsha respýblıkalyq reıdtik is-sharalar ótkizdi, - dep habarlaıdy Polisia.kz.
Reıd nátıjesi boıynsha keltirilgen málimetterge qaraǵanda, 22 myńnan astam jol júrisi qaǵıdalaryn buzýdyń joly kesilip, 500 kóliktiń jalǵan memlekettik nómirmen júrgeni anyqtaldy. Budan basqa memlekettik tirkeý nómirlik belgilerinsiz paıdalanylǵan 1,5 myńnan astam kólik anyqtalyp, 2,5 myń avtokólik arnaıy turaqtarǵa shamamen qoıyldy.
Atalǵan faktiler jalǵan memlekettik tirkeý nómirlik belgilerin paıdalaný kóbine qasaqana sıpatqa ıe ekenin jáne quqyqbuzýshylyqtar úshin jaýaptylyqtan jaltarý maqsatynda qoldanylatynyn kórsetedi.
Іshki ister mınıstrligi «Zań men Tártip» qaǵıdatyn dáıekti túrde iske asyryp, quqyqbuzýshylyqqa múldem tózbeýshilik saıasatyn ustanady.
- Árbir quqyqbuzýshylyqqa tıisti quqyqtyq baǵa berilip, kináli tulǵalar zańnamada belgilengen tártippen jaýapqa tartylady. Osyndaı quqyqbuzýshylyqtardy anyqtaý jáne jolyn kesý jumystary turaqty negizde jalǵasatyn bolady, - dedi ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Araı Tólegenqyzy.
Osyǵan deıin Abaı oblysynda bir táýlikte jalǵan nómirmen júrgen 91 zań buzýshy anyqtalǵanyn jazdyq.
