Polıtsııa alaıaqtyqtyń jańa tásili shyqqanyn eskertti
ASTANA. KAZINFORM – Sońǵy ýaqytta egde jastaǵy azamattar jıi alaıaqtardyń qurbanyna aınalyp jatyr. Qaskóıler ózderin bank nemese memlekettik organ qyzmetkerleri retinde tanystyryp, túrli syltaýmen azamattardyń aqshasy men jeke málimetterine qol jetkizýge tyrysady.
Qazir eń kóp taralǵan birneshe alaıaqtyq tásili bar.
Alaıaqtar bank shotynan aqsha urlanǵaly jatqanyn aıtyp, qarajatty shuǵyl túrde «qaýipsiz shotqa» aýdarýǵa kóndiredi. Ol úshin siltemeler jiberip nemese arnaıy qosymsha ornatýdy suraıdy.
«Qaýipsizdik júıesin jańartý» degen syltaýmen belgisiz baǵdarlamalardy júkteýdi usynady. Mundaı qosymshalar ornatylǵannan keıin alaıaqtar bank derekterine tolyq qol jetkize alady.
Keı jaǵdaılarda qaskóıler ózderin kommýnaldyq qyzmet nemese zeınetaqy uıymdarynyń qyzmetkeri retinde tanystyryp, tólemderdi qaıta esepteý nemese eseptegishterdi tekserý syltaýymen SMS-kodtar men jeke málimetterdi suraıdy.
Sonymen qatar alaıaqtar emotsııaǵa qysym jasaý tásilin de qoldanady. Olar týysyńyz qıyn jaǵdaıǵa tap bolǵanyn aıtyp, shuǵyl aqsha aýdarýdy talap etedi.
Budan bólek, qazirgi tehnologııalardy paıdalanyp, jaqyn adamnyń daýysyn nemese beınesin qoldan jasap, senimge kirýge tyrysady. Mundaı jaǵdaıda aqparatty mindetti túrde qaıta tekserý qajet.
Alaıaqtardyń qurbany bolmaý úshin qarapaıym qaýipsizdik erejelerin saqtaý mańyzdy.
Sabyr saqtap, asyǵys sheshim qabyldamańyz.
Bankpen nemese memlekettik organdarmen tek resmı nómirler arqyly baılanysyńyz.
Bank kartasynyń derekterin, SMS-kodtardy, qupııasózder men PIN-kodtardy eshkimge aıtpańyz.
Belgisiz qosymshalardy ornatpańyz jáne kúmándi siltemelerge ótpeńiz.
Kúmán týǵan jaǵdaıda mindetti túrde jaqyndaryńyzben aqyldasyńyz.
Polıtsııa azamattardy egde jastaǵy týystaryna alaıaqtyqtyń keń taralǵan tásilderin túsindirip, qaýipsizdik sharalaryn eskertýge shaqyrdy.
Aıta keteıik, SQO-da byltyr ınternet alaıaqtar turǵyndardyń 1,5 mlrd teńgesin qoldy etti.
Qazaqstanda ınternet-alaıaqtyqtan keletin shyǵyn 20 mlrd teńgege jetti.
