Polıtsııa alaıaqtyq qońyraýlardyń aldyn aldy: 24 myńnan astam sim-karta tárkilendi
ASTANA. KAZINFORM – Tek bir kúnde Balqash, Taraz, Ekibastuz jáne Petropavl qalalarynda kıberpolıtsııa bólinisteri prokýratýramen jáne uıaly baılanys operatorlarymen birlesip, sim-box jabdyqtarynyń zańsyz jumysyn áshkereleý boıynsha is-sharalar júrgizdi.
Sim-box jabdyqtarynyń ornalasý geografııasy keńeıip jatyr. Eger buryn mundaı qurylǵylar negizinen iri qalalarda tárkilense, qazir qaskóıler olardy turǵyndary az aımaqtarda da ornalastyra bastady.
Operatsııa barysynda tórt adam ustaldy, olardyń ekeýi kórshi memlekettiń azamattary. Tintý kezinde alty sim-box qurylǵysy, 24,5 myńnan astam sim-karta jáne perıferııalyq jabdyq tárkilendi.
Ustalǵandarǵa ınternet-alaıaqtarǵa kómekteskeni úshin 10 jylǵa deıin bas bostandyǵynan aıyrý jazasy kózdeledi.
Sim-box qylmyskerlerge álemniń kez kelgen jerinde bola otyryp, alaıaqtyq qońyraýlar jasaýǵa múmkindik beredi. Tek jabdyqtyń ózi sol memlekette ornalasýy jáne jergilikti baılanys operatorlarynyń trafıgin paıdalanýy jetkilikti.
Eske salsaq kıberpolıtsııa ınternet-alaıaqtyqqa arnalǵan jabdyqtary bar eki sheteldik azamatty ustaǵan edi.