Polıtsııa 8 myń dozaǵa jetetin esirtki daıyndaıtyn zerthanany áshkereledi
ASTANA. KAZINFORM — Shymkent qalasy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri sıntetıkalyq esirtki óndiretin zerthanany joıdy. Bul týraly Polisia.kz jazdy.
Jedel is-sharalar barysynda polıtseıler esirtki zattaryn daıyndaý úshin paıdalanylatyn prekýrsorlardy jetkizý arnasyn anyqtap, jolyn kesti.
— Belgili bolǵandaı, hımııalyq zattar Shymkenttegi qoımadan Jetisý oblysyna jetkizilip otyrǵan. Onda eki er adam esirtki zerthanasyn uıymdastyrǵan. Tekserý kezinde bir tonnadan astam prekýrsor, shamamen 8000 doza shyǵatyn 4,5 kelige jýyq mefedron, sondaı-aq ony daıyndaýǵa arnalǵan arnaıy jabdyqtar tárkilendi, — delingen habarlamada.
Tergeý derekterine sáıkes, kúdiktiler esirtki zattaryn tek Shymkent aýmaǵynda ǵana emes, elimizdiń basqa óńirlerine de taratýdy josparlaǵan. Qazirgi tańda tergeý áreketteri júrgizilip jatyr. Kúdiktiler qamaýǵa alyndy.
Buǵan deıin Іshki ister mınıstrligi shet memleketterdiń quqyq qorǵaý organdarymen birlesip júrgizgen aýqymdy arnaıy operatsııa barysynda adamdardy esirtki bıznesine tartýdyń transulttyq shemasyn joıǵanyn jazǵan edik.
