Polıtsııa 4 týysyn óltirdi dep kúdikke ilingen aqmolalyqtyń izin sýytpaı ustady

ASTANA. KAZINFORM – Aqmola oblysy polıtsııa departamentiniń basshylyǵy Arshaly aýdanynda jasalǵan kisi óltirý qylmysyn tergeý barysyn baqylaýyna aldy.

Áleýmettik jelilerde Arshaly aýdanynyń Jibek joly aýylynda qatygezdikpen kisi óltirý týraly habarlamalar paıda boldy. Er adam otbasy múshelerin óltirip, olardyń dene múshelerin bólshektep tastaǵan.

Beıresmı derekkózderden birden tórt adamnyń óltirilgeni belgili boldy.

Aqmola oblystyq polıtsııa departamenti baspasóz qyzmetiniń habarlaýynsha, tártip saqshylary Arshaly aýdanyndaǵy Jibek joly aýylynda kisi óltirdi degen kúdikke ilingen er adamdy ustap, ol ýaqytsha ustaý ızolıatoryna qamaldy.

- Kisi óltirý faktisi boıynsha qylmystyq is qozǵaldy. Polıtsııa departamentiniń basshylyǵy tergeý barysyn óz baqylaýyna aldy. Basqa aqparat tergeý múddesi úshin jarııalanbaıdy, - dep túsindirdi vedomstvo.

Polıtsııa sonymen qatar aımaq turǵyndaryn áleýmettik jelilerde jalǵan aqparat taratpaýǵa shaqyrdy.

- Jibek joly aýylynda kisi óltirý faktisine baılanysty messendjerler men áleýmettik jelilerde ártúrli boljamdar men jalǵan aqparat tarap jatyr. Polıtsııa azamattardy tek resmı aqparat kózderine senýge jáne tekserilmegen aqparatty taratpaýǵa shaqyrady. Kórineý jalǵan aqparatty taratqandarǵa Qazaqstan Respýblıkasynyń zańnamasyna sáıkes jaýapkershilik qarastyrylǵanyn eske salamyz, - dep qosty vedomstvo.

Osyǵan deıin Shymkentte jol ortasynda tóbelesip, kisi óltirgen kúdiktiler ustalǵanyn jazdyq.