Polıtseılerge qarsy zańsyz áreketter úshin qandaı jaýapkershilik qarastyrylǵan

Qazaqstan Respýblıkasynyń zańnamasyna sáıkes polıtsııa qyzmetkerlerine qatysty zańǵa qarsy áreketter úshin ákimshilik te, qylmystyq ta jaýapkershilik kózdelgen.

QR Qylmystyq kodeksiniń 378-baby (Bılik ókilin qorlaý)

Polıtsııa qyzmetkerin qyzmettik mindetterin atqarý kezinde nemese olardy oryndaýyna baılanysty qorlaý:

— 80 aılyq eseptik kórsetkishke (AEK) deıin aıyppul salýǵa,
— ne sol mólsherde túzeý jumystaryna,
— ne 80 saǵatqa deıin qoǵamdyq jumystarǵa,
— ne 20 táýlikke deıin qamaqqa alýǵa ákep soǵady.

Dál sol áreketter kópshilik aldynda, onyń ishinde buqaralyq aqparat quraldary, telekommýnıkatsııa jelileri nemese onlaın-platformalar arqyly jasalsa:

— 160 AEK-ke deıin aıyppul salýǵa,
— ne túzeý jumystaryna,
— ne 160 saǵatqa deıin qoǵamdyq jumystarǵa,
— ne 40 táýlikke deıin qamaqqa alýǵa ákep soǵady.

QR Qylmystyq kodeksiniń 379-baby (Bılik ókiline baǵynbaý)

Polıtsııa qyzmetkeriniń zańdy talaptaryna baǵynbaý, ıaǵnı onyń zańdy ókimderin oryndaýdan bas tartý, onyń ishinde tótenshe jaǵdaı kezinde jasalǵan bolsa:
— 2000 AEK-ke deıin aıyppul salýǵa,
— ne túzeý jumystaryna,
— ne 600 saǵatqa deıin qoǵamdyq jumystarǵa,
— ne 3 jylǵa deıin bas bostandyǵyn shekteýge,
— ne sol merzimge bas bostandyǵynan aıyrýǵa ákep soǵady.

QR Qylmystyq kodeksiniń 380-baby (Bılik ókiline qatysty qorqytý nemese kúsh qoldaný)

Bılik ókiline nemese onyń jaqyndaryna qyzmettik mindetterin oryndaýyna baılanysty nemese sol úshin kek alý maqsatynda óltiremin dep qorqytý, densaýlyqqa zııan keltiremin dep qorqytý, múlkin búldirý nemese joıý qaýpin tóndirý:

— 3 jylǵa deıin bas bostandyǵyn shekteýge nemese bas bostandyǵynan aıyrýǵa ákep soǵady.

Ómirge nemese densaýlyqqa qaýipti kúsh qoldaný:

— 10 jylǵa deıin bas bostandyǵynan aıyrý jazasyna ákep soǵady.

QR Ákimshilik quqyq buzýshylyq týraly kodeksiniń 667-baby

Polıtsııa qyzmetkeriniń zańdy talabyna baǵynbaý, sondaı-aq onyń zańdy qyzmetine aralasý, onyń ishinde bylapyt sózder aıtý, qurmetsizdik tanytý, ádepsiz minez-qulyq kórsetý, arandatý, til tıgizip tıisý, ádepsiz ısharalar nemese zattar kórsetý, sonyń ishinde buqaralyq aqparat quraldary men telekommýnıkatsııa jelilerin paıdalaný arqyly jasalǵan áreketter:

— 30 AEK mólsherinde aıyppul salýǵa

nemese

— 15 táýlikke deıin ákimshilik qamaqqa alýǵa ákep soǵady.

— Polıtsııa qyzmetkerleriniń zańdy qyzmetine kedergi keltirýge baǵyttalǵan kez kelgen áreket — qorlaý, qorqytý, zańdy talaptarǵa baǵynbaý nemese kúsh qoldaný túrinde — qoǵamdyq tártipti buzyp, azamattardyń qaýipsizdigine qaýip tóndiredi jáne mindetti túrde jaýapkershilikke ákeledi, onyń ishinde bas bostandyǵynan aıyrý jazasyna deıin. Abaı oblysy Polıtsııa departamenti azamattardy zań talaptaryn saqtaýǵa, quqyqtyq mádenıet tanytyp, bılik ókilderine qurmetpen qaraýǵa shaqyrady. Bul — qoǵamdaǵy qaýipsizdik pen turaqtylyqty qamtamasyz etýdiń mańyzdy sharty, — dep eskertti tártip saqshylary.

Budan buryn Atyraýda polıtsııa qyzmetkerlerin urǵandarǵa qatysty qylmystyq is qozǵalǵanyn jazǵanbyz.