Polıtseılerdiń robot-ıtteri Astananyń qaı aýmaǵynda jappaı iske qosylady
ASTANA. KAZINFORM — Astanada polıtsııa qoǵamdyq oryndardy baqylaý úshin jasandy ıntellektimen jumys isteıtin kameralary bar robot-ıtterdi qoldanysqa engizdi. Olar beıneni naqty ýaqyt rejıminde jiberip, quqyq qorǵaý organdary izdestirip jatqan adamdardy anyqtaýǵa kómektesedi.
Elordalyq polıtsııa departamentiniń málimetinshe, qazirgi ýaqytta adam kóp jınalatyn oryndarda tártip saqshylaryna jaǵdaıdy baqylaýǵa kómektesý úshin robot-ıtter qoldanylyp jatyr. Bul robot-ıtter negizinen «Han Shatyr» saýda ári oıyn-saýyq ortalyǵy, áýejaı, temirjol vokzaldary, sondaı-aq «Astana Arena» jáne «Barys Arena» sport keshenderiniń mańynda iske qosylǵan.
Itke uqsatyp jasalǵan bul robotqa jasandy ıntellekt tehnologııasymen jabdyqtalǵan beınekameralar qosylǵan. Qozǵalys barysynda robot beınejazbany naqty ýaqyt rejıminde Jedel basqarý ortalyǵyna (JBO) jiberip otyrady, al ondaǵy qyzmetkerler jaǵdaıdy baqylaýda ustaıdy.
— Bul polıtsııa qyzmetkerlerine qoǵamdyq oryndardaǵy jaǵdaıdy jyldam baǵalaýǵa jáne qajet bolǵan jaǵdaıda, der kezinde tıisti sharalar qabyldaýǵa múmkindik beredi, — dep habarlady polıtsııa.
Robottar izdeýde júrgen adamdardy anyqtaıdy
Osyndaı robototehnıkalyq júıelerdiń bir múmkindigi – quqyq qorǵaý organdary izdestirip jatqan adamdardy anyqtaýǵa járdemdesý. Eger jasandy ıntellekt júıesi izdeýdegi adam týraly derektermen sáıkestik bar ekenin anyqtasa, onda basqarý ortalyǵyna habarlama jiberiledi. Ortalyq qyzmetkerleri bul aqparatty tekserip, qajet bolǵan jaǵdaıda, jaqyn mańdaǵy polıtseılerge habarlaıdy.
Polıtsııa departamenti bet-álpetti avtomattandyrylǵan júıe arqyly sáıkestendirýdiń ózi ǵana adamdy tutqyndaýǵa jetkilikti negiz bola almaıtynyn atap ótti. Mundaı sheshimdi zańnamada kózdelgen quqyqtyq negizder bolǵan jaǵdaıda, tıisti ókilettigi bar polıtsııa qyzmetkerleri qabyldaıdy.
Beınejazbalardy kimder qaraı alady?
Polıtsııanyń málimetinshe, qurylǵylardan alynǵan jazbalar Jedel basqarý ortalyǵyndaǵy arnaıy qaýipsiz saqtaý ornyna joldanady. Bul jazbalardy ortalyqtyń tıisti ruqsaty bar qyzmetkerleri ǵana qaraıdy.
Robot-ıtterdiń qoǵalysy qalaı josparlanady?
Qaladaǵy qatty aıazda, qar jaýǵanda, daýyldy jel soqqanda bul robot-ıtterdiń jumysyna qatysty bir erekshelikter bar. Mundaı klımattyq jaǵdaı tehnıkanyń qazǵalysy men onyń akkýmýlıatorynyń jumys isteý merzimine áser etýi múmkin.
Polıtsııa robottardy turaqty túrde qashyqtan basqarý qajet etpeıtinin jáne olar ózdiginen qozǵala alatynyn, sondaı-aq tehnıkalyq konfıgýratsııasyna baılanysty kedergilerdi emin-erkin aınalyp óte alatynyn habarlady. Batareıanyń tolyq qýaty shamamen tórt saǵat jumys isteýdi qamtamasyz etedi.
Polıtsııaǵa ne sebepti robot-ıtter qajet?
Robottandyrylǵan júıelerdiń basty artyqshylyǵy – olardyń mobıldiligi. Statsıonarlyq beınebaqylaý kameralaryna qaraǵanda, olar belgili bir aýmaq boıynsha qozǵala alady jáne ártúrli núktelerden beınejazbalardy jiberýge múmkindik beredi.
Osyny eskere otyryp, robot-ıtter dástúrli patrýlder men qoldanystaǵy beınebaqylaý júıelerin tolyqtyrady, bul polıtsııa qyzmetkerlerine qoǵamdyq oryndarda ne bolyp jatqany týraly qosymsha aqparat alýǵa kómektesedi. Sonymen qatar olar polıtsııa qyzmetkerlerin almastyrmaıdy.
Buǵan deıin habarlanǵandaı, Astanada qoǵamdyq qaýipsizdikti qamtamasyz etý jáne quqyq buzýshylyqtyń aldyn alý úshin tórt robot-ıt qoldanysqa engizildi.
