Polıtseılerdiń bireýdiń jekemenshik kóligin paıdalanýǵa qaqysy bar ma

ÓSKEMEN. KAZINFORM — Polıtsııa qyzmetkerleriniń azamattardyń jeke menshik kóligin aıdaýyna zań boıynsha jol beriletin-berilmeıtinin bilip kórdik.

Shytyrmanǵa toly sheteldik kınolarda qylmyskerdi qýyp kele jatqan polıtseılerdiń kóshedegi kólikterge de minip alatynyn kórip júrmiz. Al kınodaǵy jaǵdaı ómirde de qaıtalanýy múmkin, qaıtalanyp jatyr da. 

Osy rette «Qazaqstanda polıtsııa qyzmetkerleri azamattardyń jeke menshik kóligin paıdalana ala ma, joq pa? Bul zań boıynsha rettelgen be?» degen suraq týyndaıdy.

Sol saýaldyń jaýabyn bilý úshin Kazinform tilshisi ShQO Polıtsııa departamentine habarlasyp kórdi. 

Materıaldyq shyǵyn óteledi

— Polıtsııa qyzmetkerleri 2014 jylǵy 23 sáýirdegi Іshki ister organdary týraly zańnyń 6-baby 2-bóligi 17-tarmaqshasyna sáıkes qylmys jasady degen kúdikke ilingen adamnyń izine túsý, oqıǵa ornyna barý, tótenshe nemese soǵys jaǵdaıy kezeńinde, qarýly qaqtyǵys jaǵdaıynda, tótenshe jaǵdaılardy joıý kezinde azamattardyń jeke menshik kóligin tizgindeýge quqyly. Sondaı-aq eger kidirtý adamdardyń ómiri men densaýlyǵyna naqty qater tóndirýi múmkin bolsa, jedel medıtsınalyq kómekke muqtaj adamdardy medıtsına uıymdaryna jetkizý úshin de kóliktiń kez kelgen túrin paıdalana alady. Biraq buǵan dıplomatııalyq ımmýnıteti bar shet memleketter ókildikteri men halyqaralyq uıymdardyń kólikteri jatpaıdy, — dep jaýap berdi departamenttiń baspasóz qyzmetinen. 

Al eger kólik ıelerine materıaldyq zalal keltirilgen jaǵdaıda Qazaqstan Respýblıkasynyń Úkimeti aıqyndaǵan tártippen shyǵyn tolyqtaı óteledi.

Demek, polıtseıler kóshede kele jatqan kólikterdi toqtatyp, aıdap kete alady. Biraq ol úshin joǵaryda aıtqan sebepter bolýy kerek. Sondyqtan tártip saqshysynyń talaby zańǵa sáıkes bolsa baǵynýǵa tıispiz. 

Eske salsaq, buǵan deıin Qyzylordada polıtsııa qyzmetkerine dórekilik kórsetken jasóspirimge qatysty qylmystyq is qozǵalǵany habarlanǵan.