Polıtseıler sheteldikterdiń Qazaqstanda zańdy júrgenin tekserýge mindetteldi
ASTANA. KAZINFORM — Іshki ister mınıstri qoǵamdyq tártipti qamtamasyz etý kezinde patrýldik polıtsııa qyzmetin atqarý jónindegi nusqaýlyqqa ózgerister engizdi.
2026 jylǵy 1 shildede qabyldanǵan buıryqqa sáıkes, patrýldik polıtsııa qyzmetkerleriniń shetel azamattarymen jumys isteý tártibi, sondaı-aq kólik nysandarynda, metropolıtende, eldi mekenderde jáne qalaaralyq avtojoldarda qyzmet atqarý mindetteri naqtylandy.
Endi patrýldik polıtsııa qyzmetkerleri shetel azamattarymen, sondaı-aq dıplomatııalyq jáne olarǵa teńestirilgen ókildikterdiń qyzmetkerlerimen tek qyzmettik mindetteri aıasynda ǵana baılanysqa túsedi. Bul quqyq buzýshylyqtyń aldyn alý jáne jolyn kesý, kólik qozǵalysynyń kestesine qatysty anyqtamalyq aqparat berý, sondaı-aq qonaqúıler men qoǵamdyq tamaqtaný oryndarynyń ornalasqan jerin kórsetý sııaqty jaǵdaılardy qamtıdy.
Sonymen qatar shetel azamattary men azamattyǵy joq adamdardyń qujattaryn tekserý kezinde polıtseıler sheteldik pasporttyń, turýǵa yqtııarhattyń nemese azamattyǵy joq adamnyń kýáliginiń jaramdylyq merzimine, vızasynyń bolýyna jáne Qazaqstan aýmaǵynda zańdy júrgenin rastaıtyn qujattarǵa nazar aýdarady. Eger zań buzýshylyq anyqtalsa, polıtsııa qyzmetkerleri Ákimshilik quqyq buzýshylyq týraly kodekske sáıkes tıisti shara qoldanýǵa mindetti.
Ózgerister patrýldik polıtsııanyń birqatar mindetin de naqtylady. Atap aıtqanda, qyzmetkerler kóshi-qon qyzmeti bólimshelerine shetel azamattary men azamattyǵy joq adamdardy elden shyǵarý kezinde qoldaý kórsetip, olardy memlekettik shekaradaǵy ótkizý pýnktterine deıin alyp júredi.
Budan bólek, polıtseıler shetel azamaty jolaýshylar poıyzynan nemese ushaqtan qalyp qoıǵan jaǵdaıda, sheteldikterdiń qatysýymen jasalǵan quqyq buzýshylyqtar, zańsyz kóshi-qon faktileri jáne zańsyz mıgranttardy ótkizýdiń belgili baǵyttary týraly kezekshi bólimge dereý habarlaýǵa mindetti.
Sondaı-aq nusqaýlyqta ákimshilik jaýaptylyqtan artyqshylyqtary men ımmýnıteti bar adamdarǵa qatysty talap naqty kórsetildi. Zańda belgilengen tártip saqtalmaıynsha, olardy májbúrlep jetkizýge nemese sot tártibimen ákimshilik jaza qoldanýǵa bolmaıdy. Olardyń qataryna Quryltaı depýtattary, Prezıdenttikke jáne Quryltaı depýtattyǵyna kandıdattar, Konstıtýtsııalyq keńestiń tóraǵasy men músheleri, Bas prokýror, Adam quqyqtary jónindegi ýákil jáne sýdıalar kiredi.
Osyndaı ózgerister eldi mekenderde jáne qalaaralyq avtomobıl joldarynda qoǵamdyq tártip pen jol qaýipsizdigin qamtamasyz etý kezinde patrýldik polıtsııa qyzmetin atqarý jónindegi nusqaýlyqqa da engizildi.
Buıryq 2026 jylǵy 25 shildeden bastap qoldanysqa engiziledi.
Buǵan deıin ІІM joǵary oqý oryndaryna qujat qabyldaý tolyq tsıfrlyq formatqa kóshkeni habarlanǵan bolatyn.
