Polıtseıler ózenniń muzy oıylǵanda sýǵa túsip ketken eki adamdy qutqaryp qaldy

Atyraý oblysynda Sharon ózeniniń muzy oıylyp, 64 jastaǵy áıel sýǵa túsip ketken. Ony qutqarýǵa umtylǵan er adam da muz oıyǵyna qulaǵan. Olardy polıtsııa qyzmetkerleri qutqaryp qaldy, dep habarlaıdy Kazinform. 

Atyraý oblystyq Polıtsııa departamenti baspasóz qyzmetiniń aqparatyna súıensek, oqıǵa 25 jeltoqsanda Qurmanǵazy aýdanynda bolǵan.

«Jergilikti ýaqytpen keshki saǵat 19:20 shamasynda Qurmanǵazy aýdanynda 64 jastaǵy áıel Sharon ózeniniń kelesi jaǵalaýyna ótpek bolǵan. Alaıda muz oıylyp, zeınetker sýǵa túsip ketken. Aýdandyq polıtsııa bólimine túsken habardy estigen tárbıe jáne kadr bólimshesiniń ınspektory Roman Nasıhan jeke avtokóligimen oqıǵa ornyna jetken. Ol avtokólikten arqan alyp, muz ústine shyqqan. Sol sátte kómekke kelgen ózge er adam muz oıyǵyna túsip ketken», - dep habarlady departamenttiń baspasóz qyzmeti.

Oqıǵa ornyna jetken patrýldik polıtsııa bóliminiń qyzmetkerleri Artýr Karımov, Nurhat Zulqarov, Ádilbek Temirbolat, Jandos Ibatýllaev, Amandyq Aıdynalıev pen ýchaskelik polıtsııa ınspektory Darhan Amanǵalıev ózenge qulaǵan áıel men er adamdy qutqaryp qalǵan. Olarǵa 28 jastaǵy jigit kómektesken. Juqa muz ústine bir ýaqytta 10-ǵa jýyq adam shyqqan sátte muz oıyǵy úlkeıgen.

Polıtsııa aǵa leıtenanty Roman Nasıhan Sharon ózeninen qutqarylǵan áıel men er adamdy jedel-járdem brıgadasyn kútpeı, jeke kóligimen aýdandyq aýrýhanaǵa jetkizdi. Qazir 64 jastaǵy áıel adam dárigerdiń baqylaýyna alyndy.

Eske sala ketelik, buǵan deıin Atyraý oblysynda jeńil kólik kólge túsip ketkenin jazǵan edik.