Polıtseıler óz ómirin qaterge tigip, káriz qudyǵyna túsip ketken eki jumysshyny qutqaryp qaldy
ASTANA. KAZINFORM - Shyǵys Qazaqstan oblysy Ulan aýdanynyń Qasym Qaısenov kentinde polıtseı óz ómirin qaterge tige otyryp, «Molodejnyı» KMK-niń eki qyzmetkerin qutqardy, – dep habarlaıdy Polisia.kz.
Búgin «Molodejnyı» KMK-niń eki qyzmetkeri Qasym Qaısenov kentindegi №11 úıdiń mańynda káriz qubyrlaryn tazalaý jumystaryn júrgizgen. Jumys barysynda er adamdardyń biri káriz qudyǵyna túsip, esinen tanyp qalǵan.
Áriptesine kómektespek bolǵan ekinshi jumysshy da artynan túsip, ol da esinen aıyrylǵan. Oqıǵany Ulan aýdanynyń krımınalısi Aset Naǵashbaev baıqap qalǵan. Ol sol mańnan ótip bara jatyp, káriz qudyǵy janyndaǵy adamdardyń dabylǵa toly aıqaıyn estip, dereý ýchaskelik polıtsııa ınspektoryna habar bergen.
Oqıǵa ornyna ýchaskelik polıtsııa ınspektory Nurdáýlet Tetepov jetti. Ár sekýndtyń mańyzdy ekenin túsingen ol kidirmesten arqan suratyp alyp, ony bekitip, káriz qudyǵyna túsken. Óz ómirine tóngen qaýipke qaramastan, polıtseı áreketin toqtatpady. Ol sanaýly mınýt ishinde aldymen bir jumysshyny, keıin ekinshisin shyǵarýǵa kómektesken. Odan soń eki azamat jedel járdem brıgadasyna tapsyryldy.
Polıtsııa kapıtany Aset Naǵashbaevtyń qyraǵylyǵy men polıtsııa maıory Nurdáýlet Tetepovtiń batyl áreketteriniń arqasynda qaıǵyly jaǵdaıdyń aldyn alý múmkin boldy.
TJM qyzmetkerleri Balqash kólinde eki balany qutqarǵanyn jazǵan edik.
