Polıtseıler men aqmolalyq aǵaıyndy eki jigit arasyndaǵy janjalǵa qatysty istiń tergeýi ІІM-niń baqylaýynda
ASTANA. KAZINFORM – Polıtseıler men 18 jáne 17 jastaǵy aǵaıyndy eki jigit arasyndaǵy janjal sońy tóbeleske ulasqannan keıin Aqmola oblystyq ishki ister departamentiniń tórt qyzmetkerine qatysty qylmystyq is qozǵaldy.
Kókshetaý qalasynyń turǵyny Aıgúl Áýbákirova áleýmettik jeliler arqyly Memleket basshysyna úndeý joldady. Onyń aıtýynsha, onyń 18 jáne 17 jastaǵy eki aǵasy «Arlan» mamandandyrylǵan bólimshesiniń qyzmetkerleriniń qolynan zardap shekken.
Aıgúl Áýbákirovanyń áńgimesinen belgili bolǵandaı, jol-kólik apatynan keıin polıtseıler onyń aǵalaryn toqtatyp, dene jaraqatyn sala bastaǵan, sodan keıin jas jigitterdi ormanǵa aparyp, uryp-soǵýdy jalǵastyrǵan. Kishi inisi qaterli isikpen aýyrady. Jábirlenýshiler keıinirek dene jaraqattarymen aýrýhanaǵa jatqyzyldy.
Aqmola oblysy polıtsııa departamentiniń baspasóz qyzmeti oqıǵaǵa qatysty túsinikteme berdi.
«Polıtsııa qyzmetkerleri men aǵaıyndy eki jigit arasyndaǵy tóbeleske ulasqan janjal saldarynan polıtsııa bólimshesiniń qyzmetkerlerine qatysty qylmystyq is qozǵaldy. Kúdikti retinde tórt qyzmetker anyqtaldy. Saraptama taǵaıyndaldy. Tergeý amaldary júrgizilip jatyr», - dep atap ótti departamentten.
Polıtsııa tergeý múddesi úshin basqa aqparatty jarııalaýǵa bolmaıtynyn qosyp ótti. Tergeý barysyn QR Іshki ister mınıstrligi óz baqylaýyna aldy.
