Polıtseıler halyqty oń róldi taksıge otyrmaýǵa shaqyrdy

ÓSKEMEN. KAZINFORM — Shyǵys Qazaqstan oblysynyń polıtsııa qyzmetkerleri turǵyndardy oń róldi taksıge otyrmaýǵa shaqyrady. 

Sebebi jol apattarynyń basym bóligi dál osyndaı kólikterdiń qatysýymen bolǵan. 

— Árqaısymyz joldaǵy qaýipsizdik úshin jaýaptymyz. Ásirese jolaýshy tasymaldaýda kez kelgen qateliktiń quny tym joǵary bolady. Oń róldi kólikterdi taksı retinde paıdalanýǵa salynǵan tyıymǵa qaramastan, zańsyz tasymaldaýshylar áli de jumysyn jalǵastyryp, jolaýshylar men basqa da kólikterge qaýip tóndirip otyr, — dep habarlady ShQO Polıtsııa departamentinen.

Mundaı kólikterdi tizgindeý jıi jol apattaryna ákelip soǵady. Sebebi oń róldi kólik júrgizýshisi joldy durys kóre almaı, qaýipti sátterge tap bolyp jatady.

— Halyqty tek qaýipsiz kólikke otyrýǵa shaqyramyz. Tańdaý ózińizde, biraq sol tańdaýdyń saldary aýyr bolýy múmkin, — delingen aqparatta.

Eske salsaq, osyǵan deıin Aqtóbede úsh kólik soqtyǵysyp, júrgizýshi men jolaýshy kóz jumǵany habarlanǵan.