Polıtseıler esirtki salyp jiberdi: Almatyda ustalǵan jigit vıdeoúndeý joldady

ALMATY. KAZINFORM — Almatyda polıtseılerdiń jas jigittiń qaltasyna belgisiz zat salǵan sáti túsirilgen beınejazbaǵa qatysty daýly oqıǵanyń jańa tustary belgili boldy.

Áleýmettik jelide sol jaǵdaıǵa qatysy bar jas jigittiń vıdeoúndeýi tarady. Ol polıtseıler ózine esirtki zatyn salyp jibergenin aıtyp otyr.

— 29 qyrkúıekte polıtsııa qyzmetkerleri meni zańsyz tintý barysynda qaltamnan esirtki zaty tabyldy dep jalǵan aıyp taqty. Alaıda olardyń ózi esirtkini qaltama salǵany beınejazbada anyq kórinedi. Bul áreketter meniń quqyǵymdy óreskel buzady jáne quqyq qorǵaý organdaryna degen senimimdi azaıtady, — dedi ol.

Jas jigit bılikten obektıvti jáne táýelsiz tergeý júrgizýdi, kináli qyzmetkerlerdi jazalaýdy surady. Qajet bolǵan jaǵdaıda beınejazba men basqa da dálelderdi usynýǵa daıyn ekenin aıtty.

Polıtsııa departamenti bul aqparat shyndyqqa janaspaıtynyn resmı túrde habarlady. Vedomstvonyń málimetinshe, bul azamat páter aqysyn tólemegeni týraly shaǵym negizinde ustalǵan jáne polıtsııa talabyna baǵynbaǵany úshin jaýapkershilikke tartylǵan.

— Bul azamatqa qatysty esirtki saqtaý nemese satý deregi boıynsha eshqandaı qylmystyq is qozǵalǵan joq. Tekserý kezinde odan tyıym salynǵan zattar tabylǵan joq. Ustaý kezinde polıtseılerdiń áreketi zań aıasynda júzege asqan, — dep málimdedi polıtsııa departamentiniń baspasóz qyzmeti.

Polıtsııa ókilderi er adamnyń buryn sottalǵanyn jáne Almaty oblysy, Eńbekshiqazaq aýdanynda probatsııalyq baqylaýda turǵanyn aıtty. Baqylaý talaptaryna sáıkes, oǵan túngi ýaqytta kóshede júrýge tyıym salynǵan, alaıda ol bul shekteýdi buzǵan. Osyǵan baılanysty probatsııalyq qyzmetke jazany qaıta qaraý jóninde usynys joldanǵan.

— Áleýmettik jeli arqyly jalǵan aqparat taratý áreketi – jaýapkershilikten qashý jáne qoldan qoǵamdyq rezonans týdyrýdyń amaly. Atalǵan fakt boıynsha er adamnyń áreketteri tekserilip, zań aıasynda baǵa beriledi, — dep habarlady polıtsııa.

Eske salaıyq, 26 qyrkúıekte áleýmettik jelide polıtsııa qyzmetkerleriniń eki adamdy tutqyndap jatqan beınejazbasy tarady. Odan jerde jatqan azamattyń qaltasyna polıtsııa qyzmetkeriniń bir zatty salǵanyn kórýge bolady. Jeli qoldanýshylary «ádeıi esirtki tastaý áreketi bolýy múmkin» dep boljady.

Degenmen Almaty qalasynyń polıtsııa departamenti bul aqparat shyndyqqa saı emestigin habarlady.