Polıtseıler el aýmaǵynda 30-dan astam qylmys jasaǵan kúdiktini ustady

Túrkistan oblysy PD Krımınaldyq polıtsııa basqarmasynyń qyzmetkerleri «Kıberqylmyspen kúreske arnalǵan baǵdarlama» josparyn iske asyrý sheńberinde jedel-izdestirý is-sharalaryn júrgizip, buryn birneshe ret sotty bolǵan, Qazaqstan aýmaǵynda birneshe qylmys jasady dep kúdikke ilingen 31 jastaǵy er adamdy ustady. Bul týraly Kazinform polisia.kz-ke silteme jasap. 

Atalmysh Jambyl oblysynyń turǵyny qylmysty aldyn ala josparlap, kez kelgen ótip bara jatqan adamdardan qońyraý shalý úshin uıaly telefondaryn surap alyp, sodan keıin boı tasalap otyrǵan. Ol urlaǵan uıaly telefondardy iri qalalardyń bazarlarynda satyp, aqshany óz qajettiligine jumsaǵan. 

Búgingi tańda polıtseıler kúdiktiniń Túrkistan oblysynda jasalǵan 10 alaıaqtyq qylmysy men 1 avtokólik urlaý faktisine qatysy bar ekenin dáleldedi. 

Sonymen qatar er adamǵa Qyzylorda oblysynda urlyq jasaǵany úshin izdeý jarııalanǵan. Sondaı-aq «urlyq» pen «alaıaqtyq» baptary boıynsha Qazaqstannyń 3 megapolısi men 5 oblysynda jasalǵan 22 qylmysqa qatysy bary anyqtaldy. 

Qazirgi ýaqytta kúdikti qamaýǵa alyndy. Onyń basqa osyǵan uqsas ashylmaǵan qylmystarǵa qatystylyǵy tekserilip jatyr. Sotqa deıingi tergeý amaldary júrgizilip, oqıǵanyń tolyq mán-jaıy anyqtalýda.