Polıtseıler bopsalaýmen aınalysqan 20-dan astam jastar tobyn ustady

ASTANA. KAZINFORM – Qazaqstandyq polıtseıler bopsalaýmen aınalysqan 20-dan astam jastar tobyn ustady, – dep habarlaıdy Polisia.kz.

Іshki ister mınıstrligi jastar arasyndaǵy bopsalaý faktilerin anyqtap, olardyń aldyn alýdy erekshe baqylaýda ustaıdy. Osy jyly polıtsııa qyzmetkerleri bopsalaýdyń 400-den astam deregin tirkedi, onyń 39-y mektepter men kolledjderde jasalǵan.

Oqý oryndarynda 60 myńǵa jýyq profılaktıkalyq is-shara ótkizildi, onda bopsalaý, býllıng jáne zorlyq-zombylyq kórsetýmen baılanysty máseleler talqylandy. Mektepter men kolledjderde anonımdi saýalnamalar júrgizilip, oqýshylar arasynda bopsalaýdyń 50-den astam yqtımal faktisi anyqtaldy. Barlyq jaǵdaı tekseriletin bolady. Mundaı faktilerdi ýaqytyly anyqtap, jolyn kesý jasóspirimder qylmysynyń aldyn alýǵa yqpal etedi. Jyl basynan beri bopsalaýmen aınalysatyn 23 jastar tobynyń áreketine tosqaýyl qoıyldy. Máselen, qyrkúıek aıynda Aqtóbe qalasynda uıymdasqan qylmysqa qarsy kúres basqarmasynyń qyzmetkerleri kolledjdiń kámeletke tolmaǵan stýdentin ustady. Ol 15 jastaǵy jasóspirimnen 50 myń teńge kóleminde aqsha bopsalaǵan. Kúdikti quryqtalyp, sotqa deıingi tergeý bastaldy.

«Jambyl oblysynda jasóspirim jeke derekterdi taratamyn dep qorqytý arqyly óz qatarlastarynan aqsha bopsalaǵan. Osyndaı 8 fakt tirkelip, qylmystyq is sotqa jiberildi. Petropavl qalasynda polıtsııa qyzmetkerleri jastar tobynyń múshelerin ustady. Olar zorlyq-zombylyq pen qorqytý arqyly jábirlenýshilerdi qaryz rásimdeýge májbúrlep, keıinnen ony qolma-qol aqshaǵa aınaldyryp otyrǵan. Kúdiktiler qamaýǵa alyndy. Esterińizge sala keteıik, qylmystyń bul túri úshin 14 jastan bastap qylmystyq jaýapkershilik qarastyrylǵan. Kámeletke tolmaǵandar arasyndaǵy qylmystyń aldyn alý máselesi únemi baqylaýda», - delingen habarlamada.