Polıtseıler 79 medıtsına qyzmetkerin ne úshin jaýapqa tartqany belgili boldy

Quramynda esirtki zattary bar preparattardy saqtaý tártibine qatysty medıtsına qyzmetkerleri tekserilip, 79 adam ákimshilik jaýapkershilikke tartyldy. Bul týraly Іshki istir mınıstrligi Esirtkige qarsy is-qımyl departamenti bastyǵynyń orynbasary Baqytjan Ámirhanov málim etti, dep habarlaıdy Kazinform.

Bıylǵy 13-17 qarasha aralyǵynda el aýmaǵynda «Dármek» keń aýqymdy jedel-aldyn alý is-sharasy ótkizildi. Onyń negizgi mindeti – esirtki, psıhotroptyq zattar men prekýrsorlardy kontrabandalyq ákelý, sondaı-aq olardyń zańsyz aınalymǵa shyǵarý derekterin anyqtaý jáne jolyn kesý.

Tekserý nátıjesinde farmatsevtıkalyq qyzmet jáne dárilik zattardyń aınalymy salasyndaǵy erejeni oryndamaǵan medıtsına qyzmetkerleri anyqtaldy.

«Biz toqsan saıyn jedel-aldyn alý is-sharasyn ótkizip turamyz. Sondyqtan medıtsına qyzmetkerleri preparattarǵa qatysty talapty kúsheıtýi kerek. Ásirese, Qazaqstanda aınalymy shektelgen preparattarǵa erekshe nazar aýdarý qajet. Atap aıtqanda, ákimshilik jaýapkershilikke 249 adam, onyń ishinde 79 medıtsına qyzmetkeri tartyldy. Barlyq materıaldar Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń aýmaqtyq departamentterine joldandy», - dedi B. Ámirhanov ІІM baspasóz qyzmeti alańynda ótken brıfıngte.

Budan buryn habarlanǵandaı, bıyl zańsyz aınalymdaǵy 37 tonnadan astam esirtki tárkilendi.