Polıtseıler 33 jyl qujatsyz júrgen turǵynǵa kómektesti
ASTANA.KAZINFORM - Shyǵys Qazaqstan oblysy polıtsııa departamentine Rıdder qalasynyń turǵynynan alǵys hat kelip tústi. Bul oqıǵa kóshi-qon qyzmetkerleriniń kásibı biliktiligi men azamattarǵa kórsetiletin qoldaýdyń naqty kórinisi boldy.
Rıdder qalasynyń turǵyny 33 jyl boıy jeke basyn kýálandyratyn qujatsyz ómir súrgen. Sonyń saldarynan memlekettik qyzmetterdi alý jáne kúndelikti ómirdegi kóptegen máseleni sheshý múmkindigi shektelip kelgen.
ІІM baspasóz qyzmeti málimetinshe, azamattyń ótinishinen keıin kóshi-qon qyzmetiniń ınspektorlary jaǵdaıdy jan-jaqty zerdelep, qajetti qujattardy jınaýǵa kómektesken. Sondaı-aq jeke kýálikti rásimdeýdiń barlyq kezeńinde quqyqtyq qoldaý kórsetti.
Kópten kútken qujatyn qolyna alǵan turǵyn alǵysyn bildirdi.
– Bul máseleni sheshemin degen úmitim úzilgen edi. 33 jyl boıy qujatsyz ómir súrdim. Al qazir jańa ómir bastalǵandaı sezimdemin. Polıtsııa qyzmetkerlerine shyn júrekten alǵysymdy bildiremin, - dedi ol.
Polıtsııa halyqqa memlekettik qyzmet kórsetý jumystary turaqty negizde jalǵasyp jatqanyn habarlady. Jeke basyn kýálandyratyn qujattardy rásimdeý nemese qalpyna keltirý máseleleri týyndaǵan jaǵdaıda azamattar aýmaqtyq kóshi-qon qyzmeti bólimshelerine júgine alady.
Buǵan deıin Almatyda 20 jyl qujatsyz júrgen zeınetker jeke kýálik alǵanyn jazǵan edik.
