Polıtseıler 11 myń turǵyn úı men basqa da nysandardy kúzetke aldy
ASTANA. KAZINFORM – Polıtsııa sý tasqynynan zardap shekken 59 eldi mekendi qorshaýǵa aldy. Bul týraly ІІM resmı ókili Shyńǵys Alekeshev aıtty.
«Qazaqstanda sý tasqyny saldaryn joıý isi jalǵasyp jatyr. Іshki ister organdarynyń qyzmetkerleri kúsheıtilgen rejımde qyzmet atqarýda. ІІM men óńirlik departamentterde jedel shtabtar táýlik boıy jumys istep jatyr. Qutqarý jáne sý tasqynyna qarsy is-sharalarǵa 5,5 myńnan astam polıtsııa qyzmetkeri men Ulttyq ulannyń áskerı qyzmetshisi, sonymen qatar ІІM oqý oryndarynyń kýrsanttary, 828 tehnıkasy jumyldyryldy», - dedi ol Ortalyq kommýnıkatsııalar qyzmetindegi brıfıngte.
Onyń dereginshe, polıtsııa qyzmetkerleri 10 myń metr aryqty tazartyp, 590 myń qap tósedi. Sý basqan óńirlerde patrýldeý jáne kezekshilik táýlik boıy júrgizip jatyr. Tártip saqshylary jergilikti turǵyndardyń eshqaısysy sý basý qaýpi bar aımaqta qalyp ketpeýi úshin eldi mekenderde jappaı reıd júrgizýdi qolǵa alǵan.
«Qaraýsyz qalǵan múlikti kúzetý úshin polıtsııa sý tasqynynan zardap shekken 59 eldi mekendi qorshaýǵa aldy. Qazirgi ýaqytta ishki ister organdarynyń kúzetinde qaraýsyz qalǵan 11 myń turǵyn úı men basqa da nysandar bar. Urlyq-qarlyqqa jol berilmedi. ІІM kúshimen búgingi kúnge deıin 32 myńnan astam adam evakýatsııalandy. Azamattar 104 iri ýaqytsha ornalastyrý pýnktine ornalastyryldy», - dedi ІІM resmı ókili.
