«Polıtseıdiń eskertýin elemegen»: Atyraý oblysynda jol apatynan júrgizýshi men jolaýshy mert boldy

Atyraý oblysynda polıtseılerdiń eki márte eskertýin elemegen júrgizýshi jol apatyna tústi. Jol-kólik oqıǵasynyń saldarynan júrgizýshi men bir jolaýshy kóz jumyp, úsh adamǵa medıtsınalyq kómek kórsetildi, dep habarlaıdy Kazinform. 

Oblystyq polıtsııa departamenti baspasóz qyzmetiniń aqparatyna qaraǵanda, jol-kólik oqıǵasy búgin, 2 qańtarda bolǵan.

«Búgin jergilikti ýaqytpen saǵat 08:30 shamasynda Toyota Alfhard avtokóligi aýdaryldy. Jol apatyn respýblıkalyq mańyzy bar Aqtóbe-Atyraý-Astrahan tas jolynyń 426-shaqyrymy tusynda boldy. Kóliktiń rýlinde bolǵan 1993 jylǵy júrgizýshi basqarý júıesin ıgere almaı qalǵan. Jol-kólik oqıǵasynyń saldarynan kólik júrgizýshisi men bir jolaýshy oqıǵa ornynda qaza tapty. Al 3 jolaýshyǵa alǵashqy medıtsınalyq kómek kórsetildi», - dep habarlady departamenttiń baspasóz qyzmeti.

Belgili bolǵandaı, atalǵan avtokólik júrgizýshisine Qyzylqoǵa aýdandyq polıtsııa bóliminiń patrýldik polıtsııa qyzmetkerleri eki ret eskertý jasaǵan. Birinshi ret aýdan ortalyǵy – Mııaly aýylynyń tusynda eskertý bergen. Keıin Saǵyz aýylynyń mańynda ornalasqan bekette taǵy bir eskertý jasaǵan.

Alaıda polıtsııa qyzmetkerleriniń eskertýin elemegen júrgizýshi jol apatyn jasap, óziniń jáne taǵy bir jolaýshynyń kóz jumýyna sebepker boldy.

Eske sala ketelik, budan buryn Atyraý oblysynda jol apatynan 2 adam kóz jumyp, beseýi aýrýhanaǵa túskenin habarlaǵan bolatynbyz.