Polıtseı joǵalǵan maldy taýyp, boranda adasyp qalǵan adamdardy qutqardy
Pavlodar oblysynyń polıtseıi joǵalǵan mal men boranda qalǵan adamdardy izdep tapty. Kazinform bul týraly Polisia.kz-ke silteme jasap habarlaıdy.
«Pavlodar oblysynyń turǵyndary eki kúnnen beri qatty jel, kóktaıǵaq, qardyń qalyń jaýýy, joldyń jetkiliksiz kórinýi» degen sıpattaǵy SMS-habarlamalardy alyp jatyr. 7 qańtardan bastap aımaqtaǵy birneshe trassa jabyq kúıinde qalady.
«Tańerteń maǵan Shıqyldaq aýylynyń turǵyny Qanapııa Dúısenbaev qońyraý shaldy. Ol menen kómek surady, onyń 30 bas qoıy borannan jelmen yqtap joǵalyp ketken eken. Dalada eshteńe kórinbegen, qatty jel soǵyp, kólik ártúrli baǵytta júrdi. Biz aýyl turǵyndarymen birge izdeýge shyqtyq. Іzdeý úsh saǵatqa sozyldy, nátıjesinde aýyldan 7 shaqyrym jerde qoılar tabyldy», – dedi Ekibastuz qalasy PB ýchaskelik polıtsııa ınspektory Bıkanov Aıan.
Qoıdy jaıaý izdep júrgende ýchaskelik polıtsııa qyzmetkeri ishinde adamdary bar jeńil kólikti kórdi. Belgili bolǵandaı, Ekibastuz turǵyndary balyq aýlaýǵa shyqqan eken, al boran bastalǵan kezde olar úıge qaıtyp oralmaqshy bolǵan. Biraq dalada eshteńe kórinbegendikten olar adasyp, bir kún kólikte otyrǵan.
«Dosym ekeýmiz balyq aýlaýǵa shyqtyq, qatty boran bastalyp, qaıtyp oralýǵa sheshim qabyldadyq. Biraq adasyp kettik, kólik qarly boranǵa keptelip qaldy. Biz artqa da, alǵa da shyǵa almaı turyp qaldyq. Bir kún turdyq, sýyqtan tońyp, qatyp qaldyq, shynymdy aıtsam, ómirmen qoshtasýǵa daıyn boldyq. Biraq sodan keıin bireý bizge qol bulǵap turǵanyn kórdik. Ýchaskelik polıtseı Aıan bizdi shyǵaryp alyp, eldi mekenge jetýge kómektesti. Oǵan úlken raqmet», – deıdi qutqarylǵan qala turǵyndary.
