Politico: Madýroǵa AQSh aıyp taqsa, ol «zańdy nysanaǵa» aınalýy múmkin

ASTANA. KAZINFORM — Venesýela prezıdenti Nıkolas Madýro eger oǵan esirtki saýdasyna nemese terrorızmge qatysy bar degen resmı aıyp taǵylsa, AQSh úshin «zańdy nysanaǵa» aınalýy múmkin. Bul týraly Politico basylymy bul jaǵdaımen jaqsy tanys derekkózine silteme jasap habarlady.

Agenttik dereginshe, Vashıngtonda Venesýela basshysyna qarsy is-qımyldyń jańa nusqalary talqylanyp jatyr. Munyń bári AQSh-tyń esirtki kartelderine qarsy kúres aıasynda júzege asyrylýy múmkin.

«Anyǵynda biz esirtki satýshylar men terrorısterdi qýdalap jatqan joqpyz ba?» dedi agenttikke suhbat bergen derekkóz.

Burynǵy amerıkalyq sheneýnikterdiń aıtýynsha, AQSh prezıdenti Donald Tramptyń jospary — Venesýela basshysyn bılikten ketýge májbúrleý. Bul áreket resmı túrde «rejımdi aýystyrý» dep jarııalanbaıdy, sondyqtan Vashıngton Venesýelada týyndaýy múmkin saldar úshin az jaýapkershilik arqalaıdy.

«Sarapshylardyń pikirinshe, bul tásil Trampqa halyqaralyq arenada álsiz bolyp kórinbeýge jáne Venesýeladaǵy jaǵdaıǵa tikeleı aralaspaı-aq saıası qysym kórsetýge múmkindik beredi», dep jazdy Politico basylymy.

Eske sala keteıik, AQSh-Venesýela shıelenisine baılanysty amerıkalyq áýe tasymaldaýshylar toby Karıb teńizine kelgenin habarlaǵanbyz.