Polıpropılen óndirisiniń jospardan tys toqtap qalýy alańdatady – Úkimet basshysy

ASTANA. KAZINFORM — Úkimet basshysy Oljas Bektenov polıpropılen zaýyty qyzmetiniń jospardan tys toqtap qalý sebepterin anyqtap, saldaryn joıýdy júktedi.

— Polıpropılen zaýytynda óndiristiń jospardan tys toqtap qalýy jáne polıetılen men býtadıen shyǵarý jobalaryn iske asyrý kezeńderiniń sozylyp ketýi alańdaýshylyq týǵyzyp otyr. Munda merzimdi buljytpaı saqtaý, óndiristiń toqtap qalý qaýpin azaıtý jáne basqarýshylyq tártipti kúsheıtý qajet. «Samuryq-Qazyna» qory bıyl 15 maýsymǵa deıin KPI zaýytynyń toqtap qalý sebepterin joıýdyń naqty kestesin, sondaı-aq Silleno zaýytynyń aıaqtalý kezeńderi men merzimin kórsete otyryp, jańartylǵan jospar-kestesin daıyndap, usynýdy tapsyramyn. Sonymen birge bıyl 1 tamyzǵa deıin býtadıen jobasy boıynsha túpkilikti sheshim qabyldańyzdar, — dedi Oljas Bektenov Úkimet otyrysynda. 

Sondaı-aq Premer-mınıstr qolǵa alynǵan munaı-gaz-hımııa ónerkásibi týraly zań jobasyn qoldady. 

— Munaı-gaz bıznesi ókilderimen ótken keńeste munaı-gaz hımııasy salasy týraly jeke zań ázirleý máselesi kóterildi. Bul bastamany qoldaımyn. Energetıka mınıstrligi, Ónerkásip jáne qurylys mınıstrligi, Ulttyq ekonomıka mınıstrligi jáne Ádilet mınıstrlikteri bıyl 1 qyrkúıekke deıin Úkimet apparatyna tıisti zań jobasyn engizýdi tapsyramyn, — dep tolyqtyrdy O. Bektenov.

Buǵan deıin habarlaǵanymyzdaı, elimizde munaı-gaz-hımııa ónerkásibi týraly zań jobasy ázirlenip jatyr.

Odan bólek Premer-mınıstr elimizden hımııa óndirisi shıkizatynyń 45% eksportqa tereń óńdelmeı shyǵarylatynyn aıtyp, daıyn ónimdi shyǵarý kerektigin eskertti. 

Aıta keteıik, elimizde munaı-gaz salasyn damytýdyń jol kartasy aıasynda 3,5 myń turaqty jumys orny ashylady.