Polıpropılen qysymǵa tústi: Taıaý Shyǵystaǵy qaqtyǵys jahandyq polımer naryǵyn qalaı ózgertti
ASTANA. KAZINFORM – Energy Monitor qoǵamdyq qorynyń dırektory Nurlan Jumaǵulov 2026 jyly polımer naryǵynda baǵanyń kúrt ósýine qatysty pikir bildirdi.
Onyń aıtýynsha, qazirgi qymbatshylyqqa eki faktor áser etti: 2025 jylǵy uzaq stagnatsııa jáne 2026 jyldyń basyndaǵy geosaıası kúızelis.
— 2025 jyly álemdik polıpropılen naryǵynda artyq óndiris, suranystyń álsizdigi jáne shıkizat baǵasynyń tómendeýi baıqaldy. Qytaı 6,4 mln tonna jańa qýat iske qosyp, eksportty 29%-ǵa, shamamen 3 mln tonnaǵa deıin ulǵaıtty. Bul baǵaǵa qysym túsirdi. Eýropada PMI ındeksi jyl ishinde bir-aq ret 50-den asty. Túrkııada qaıta óńdeýshiler qýatynyń tek 40–60%-yn paıdalandy. Naryqta usynys tym kóp boldy, — dedi
Onyń sózinshe, betburys 2026 jyldyń naýryzynda boldy.
— Taıaý Shyǵystaǵy qaqtyǵystyń ýshyǵýy shıkizat jetkizilimine, logıstıkaǵa jáne óndiris jumysyna keri áser etti. Arab túbegindegi 28 mln tonna qýattyń shamamen 21 mln tonnasy, Irandaǵy 7,5 mln tonna qýat toqtap qaldy. Toqtaý merzimi birneshe aıdan bir jylǵa deıin, tipti odan da uzaqqa sozylýy múmkin. Sonyń saldarynan álemdik naryqta turaqty tapshylyq qalyptasty, — dedi sarapshy.
Onyń aıtýynsha, Taıaý Shyǵys ımportyna táýeldi Eýropada polıpropılen baǵasy eki ese ósti. Azııada Katar men óńirdiń ózge elderinen keletin gazdyń qymbattaýy óndiris shyǵynyn arttyrdy, al Qytaıda qýat júktemesi 76%-dan 63%-ǵa tústi. Negizgi sebep — propan, nafta jáne ózge de shıkizat baǵasynyń ósýi.
Qazaqstanǵa toqtalǵan sarapshy KPI kompanııasy da baǵa saıasatyn ózgertýge májbúr bolǵanyn aıtty.
— Qaqtyǵys bastalǵaly beri Atyraýdaǵy FCA baǵasy 122 500 teńgege, ıaǵnı shamamen 260 dollarǵa nemese 19%-ǵa ósti. Eksport baǵasy budan da qatty kóterildi: Eýropa baǵyty boıynsha — 1000 dollarǵa nemese 110%-ǵa, Túrkııa boıynsha — 650 dollarǵa nemese 72%-ǵa. Soǵan qaramastan, KPI-diń ishki naryqtaǵy baǵasy áli de eń tómen deńgeıde qalyp otyr, — dedi ol.
Sondaı-aq ol sáýirdiń basynda qytaılyq treıderler polıpropılendi jetkizý men baj salyǵyn qosqanda QQS-pen 720–750 myń teńgeden usynyp otyrǵanyn aıtty. Bul KPI-diń ishki naryqtaǵy baǵasynan joǵary.
— Baǵanyń ósýi túsinikti: KPI propandy «Teńizshevroıldan» munaıdyń álemdik baǵasyna baılanǵan formýlamen satyp alady. Sondyqtan jahandyq naryqtaǵy ózgeris qazaqstandyq óndirýshiniń ózindik qunyna tikeleı áser etedi, — dep túıindedi Jumaǵulov.
