Polıomıelıttiń paıda bolýy men taralýynyń aldyn alý jóninde sanıtarııalyq-epıdemııaǵa qarsy sharalar kúsheıtildi
ASTANA. Mamyrdyń 11-i. QazAqparat /Ernur Aqanbaı/ - QR Densaýlyq saqtaý mınıstrligi polıomıelıttiń paıda bolýy men taralýynyń aldyn alý jóninde sanıtarııalyq-epıdemııaǵa qarsy sharalardy kúsheıtti,
dep habarlaıdy QazAqparat.
«Dúnıe júzinde polıomelıtpen syrqattanýshylyq boıynsha epıdemıologııalyq jaǵdaıdyń kúrdelenýine baılanysty, Qazaqstan aýmaǵynda polıomıelıttiń paıda bolýynyń jáne taralýynyń aldyn alý jóninde sanıtarııalyq-epıdemııaǵa qarsy is-sharalardy kúsheıtý maqsatynda Densaýlyq saqtaý mınıstrligi Memlekettik sanıtarlyq-epıdemıologııalyq qadaǵalaý komıtetiniń tóraǵasy, Bas memlekettik sanıtarııalyq dáriger Keńes Ospanov «Qazaqstan Respýblıkasynyń aýmaǵynda polıomıelıttiń paıda bolýy men taralýynyń aldyn alý boıynsha sanıtarııalyq-epıdemııaǵa qarsy is-sharalardy kúsheıtý týraly» qaýlyǵa qol qoıdy», delingen Densaýlyq saqtaý mınıstrligi baspasóz qyzmetiniń taratqan habarlamasynda.
Atap aıtqanda, QR Densaýlyq saqtaý mınıstrliginiń Memlekettik sanıtarlyq-epıdemıologııalyq qadaǵalaý komıtetiniń oblystardaǵy, Astana jáne Almaty qalalaryndaǵy departamentteriniń dırektorlaryna densaýlyq saqtaý salasynyń basty nysandaryna, onyń ishinde qalpyna keltirý jáne fızıoterapııalyq ortalyqtarǵa aptasyna keminde 1 ret barý arqyly jiti enjar paralıch jaǵdaılaryn belsendi izdeýdi kúsheıtý týraly tapsyrma berilgen.
MSEQK-niń kóliktegi departamentteriniń dırektorlaryna Qazaqstan Respýblıkasynyń memlekettik shekarasy arqyly ótkizý pýnktterinde polıomıelıt boıynsha jaǵdaı qolaısyz elderden kelgen jolaýshylarǵa sanıtarııalyq-karantındik baqylaýdy kúsheıtý, polıomıelıt boıynsha jaǵdaıy qolaısyz elderden kelgen adamdarda ınfektsııalyq aýrý belgileri, onyń ishinde polıomıelıt belgileri bilingen kezde, kelip toqtaǵan jerdegi aýmaqtyq densaýlyq saqtaý uıymdaryna medıtsınalyq kómekke ýaqtyly júginýi jóninde aqparat berýdi qamtamasyz etý tapsyrylǵan.
MSEQK departamentteriniń dırektorlaryna jáne oblystardyń, Astana men Almaty qalalarynyń densaýlyq saqtaý basqarmalarynyń bastyqtaryna medıtsınalyq qarsylyqtardyń negizdiligin, vaktsınatsııamen az qamtylǵan, kóship kelgen adamdar sany kóp aýmaqtardy, tirkelmegen adamdar men halyqtyń shalǵaıdaǵy toptaryn eskere otyryp, árbir pedıatrııalyq ýchaske boıynsha 5 jasqa deıingi balalardyń egilýine taldaý júrgizý tapsyryldy.
Jasy boıynsha vaktsınatsııamen tolyq qamtylmaǵan adamdar anyqtalǵan jaǵdaıda (3 dozadan kem) egýler arasyndaǵy jıilik pen aralyq (4 aptadan kem emes) eskerile otyryp polıomıelıtke qarsy ımmýndaýdy qamtamasyz etý;
Kóshi-qon qyzmetiniń aýmaqtyq organdarymen birlesip Tájikstan Respýblıkasy azamattarynyń meken-jaılaryn, sanyn, egý anamnezin anyqtaý jáne esepke alý boıynsha jumys júrgizý; Egilmegen jáne egilýi týraly qujattamalyq rastalýy joq 15 jasqa deıingi balalarǵa polıomıelıtke qarsy vaktsınatsııa kýrsyn (úsh ret) júrgizý; Tájikstan Respýblıkasyna jáne polıomıelıt boıynsha qolaısyz elderge baratyn adamdar júgingen jaǵdaıda, aýmaqtyq densaýlyq saqtaý uıymdarynda polıomıelıtke qarsy qosymsha ımmýndaý júrgizý týraly tapsyrma berildi.
Osy qaýlynyń tolyq mátini QR Densaýlyq saqtaý mınıstrliginiń saıtynda «Sanıtarlyq-epıdemıologııalyq qadaǵalaý bóliminde» ornalastyrylǵan.
