Polıomıelıtke qarsy ımmýndaý júrgizý úshin Qazaqstan Úkimeti 2 mln. doza vaktsına satyp aldy
ASTANA. Qyrkúıektiń 6-sy. QazAqparat -Polıomıelıtke qarsy ımmýndaý júrgizý úshin Qazaqstan Úkimeti ıÝNISEF-tiń qoldaýymen 2 mln. doza vaktsına satyp aldy, onymen 1,8 mln. bala egilmek. Bul týraly QR Densaýlyq saqtaý mınıstrligi baspasóz qyzmetiniń taratqan habarlamasynda aıtylǵan.
Baspasóz qyzmetiniń málimetinshe, aýyzǵa quıylatyn úsh valentti polıomıelıt vaktsınasy Belgııada shyǵarylady, onyń óndirisi Dúnıejúzilik densaýlyq saqtaý uıymymen sertıfıkattalǵan. «Immýndaý naýqanynda 4500-den asa egý brıgadasy, onyń ishinde 1200 barynsha ıkemdi brıgada qatysady, olar shalǵaı eldi mekenderde jáne halqynyń sany az pýnktterde vaktsınatsııalaý júrgizedi. Vaktsınatsııa respýblıkanyń 6591 egý pýnktinde júrgiziledi. Astanada polıomıelıtke qarsy ımmýndaý naýqany barysynda 6 jasqa deıingi 72588 balany egý josparlanýda. Vaktsınatsııa 58 egý pýnkti ashylǵan 14 medıtsınalyq uıymda júrgiziledi», delingen taratylǵan habarlamada.
Polıomıelıt (Poliomyelitis) - nerv júıesin zaqymdaıtyn, enjar atrofııalyq paralıchter, bulshyq etterdiń, kóbinese aıaqtyń jáne deneniń parezin týdyratyn jiti ınfektsııalyq aýrý.
Baspasóz qyzmetiniń málimetinshe, Dúnıejúzilik densaýlyq saqtaý uıymy Qazaqstan Respýblıkasyn 2002 jyldan bastap polıomıelıtten azat el retinde sertıfıkattaǵan. Polıomıelıttiń sońǵy jaǵdaıy respýblıkada 1995 jyly tirkelgen. Qazaqstanǵa polıomıelıttiń ákelinýi men taralýyn boldyrmaý maqsatynda Qazaqstan Respýblıkasy Densaýlyq saqtaý mınıstrligi 2010 jylǵy qyrkúıektiń 6-10 aralyǵynda 6 jasqa deıingi balalarǵa polıomıelıtke qarsy qosymsha bir rettik ımmýndaý júrgizedi.
«Infektsııa tamaq, sý arqyly, qarym-qatynas-turmystyq, sondaı-aq aýa-tamshy (sırek) jolymen beriledi. Polıomıelıttiń qozdyrǵyshy sýda, sútte, aǵyndy sýlarda uzaq ýaqyt boıy saqtalady jáne qaınatqanda joıylady. Polıomıelıtpen barlyq jastaǵy adamdar, biraq kóbinese 15 jasqa deıingi balalar aýyrýy múmkin. Polıomıelıttiń ózindik emi joq. Ýaqtyly vaktsınatsııalaý bul aýrýdan qorǵanýdyń jalǵyz quraly bolyp tabylady. Profılaktıkalyq egýlerdiń ulttyq kúntizbesine sáıkes vaktsınatsııalaý sábı ómiriniń 2, 3, 4 jáne 12-15 aılarynda júrgiziledi. Immýndaý úshin kepildi sapasy bar DDU sertıfıkattaǵan polıomıelıtke qarsy vaktsına qoldanylady», delingen taratylǵan habarlamada.
