Polıgrafologııalyq tekserýler sybaılas jemqorlyqqa beıim laýazymdardyń barlyǵyna engizilýi múmkin - Á. Báımenov
ASTANA. 28 naýryz. QazAqparat - Barlyq memlekettik organdardaǵy laýazymdarǵa kandıdattar úshin polıgrafologııalyq tekserý engizilýi múmkin.
Bul týraly búgin «Amanat» zııatkerlik klýbynda memlekettik qyzmet salasyn jetildirý máselelerin talqylaý barysynda QR Memlekettik qyzmet isteri agenttiginiń tóraǵasy Álıhan Báımenov málim etti.
Tóraǵanyń aıtýynsha, búgingi kúni Ekonomıkalyq qylmysqa jáne sybaılas jemqorlyqqa qarsy kúres agenttigimen birlese otyryp, elimizdegi barlyq memlekettik organdar arasyndaǵy sybaılas jemqorlyqqa beıim laýazymdar tizimi anyqtalǵan. «Dál osy laýazymdarǵa kandıdattardy qabyldaý barysynda olar úshin polıgrafologııalyq tekserýler engizilýi múmkin. Degenmen, meniń oıymsha, memlekettik organdardyń barlyq laýazymdaryna birdeı kandıdattar úshin ondaı tekserýden ótkizýdiń qajettiligi shamaly», - dedi Á. Báımenov.
Eske salsaq, Májiliste talqylanyp jatqan zań jobasyna sáıkes, quqyq qorǵaý organdaryna qyzmetke turýǵa kandıdattardyń mindetti túrde polıgrafologııalyq zertteýden ótý tártibi usynylǵan bolatyn. Bul rette quqyq qorǵaý qyzmetine kandıdatty polıgrafologııalyq tekserýdi psıhofızıologııalyq kýálandyrýdyń bir bóligi retinde taný jón dep esepteledi.
