Polıgraf tekserýinen súrinbeı ótken 191 sýdıa laýazymyna kiristi

ASTANA. QazAqparat - Polıgraf tekserýinen súrinbeı ótken 191 sýdıa laýazymyna kiristi. Bul týraly búgin Úkimet úıinde «100 naqty qadam» Ult josparynyń iske asyrylý barysyna arnalǵan baspasóz máslıhatynda QR Joǵarǵy soty janyndaǵy Sottardyń qyzmetin qamtamasyz etý departamentiniń basshysy Nurserik Sháripov málim etti, dep habarlaıdy QazAqparat.

«Biliktiligi joǵary sýdıalar korpýsyn qalyptastyrý asa mańyzdy máselelerdiń biri bolyp qalýda. Sýdıa laýazymyna kandıdattarǵa qoıylatyn biliktilik talaptary men olardy irikteý tetikteri aıtarlyqtaı kúsheıtildi. Olar úshin psıhologııalyq test pen polıgrafpen tekserý engizildi», - dedi ol.

Onyń aıtýynsha, sýdıalardyń shekti jasy da 25-ten 30 jasqa joǵarylatylǵan. Sýdıa laýazymyna kandıdattar úshin zańgerlik mamandyǵy boıynsha mindetti túrde 2 jyl jumys óteli bolýy tıis.

«Aǵymdaǵy jyly  jańa ereje boıynsha jergilikti sottardyń sýdıasy laýazymyna 191 kandıdat iriktep alynyp, taǵaıyndaldy. Endigi ýaqytta sýdıalar ózderiniń biliktiligin jumysqa kirisken birinshi jylynan keıingi 5 jyl saıyn rastap otyratyn bolady. Aǵymdaǵy jyly 140 sýdıanyń kásibı qyzmetine baǵalaý júrgizildi. 2016 jyly 1220 sýdıa qyzmeti baǵalanǵan bolatyn. Sýdıalar korpýsynyń negizgi bóligi ózderiniń kásibı quzirettiligin dáleldep shyqty», - dedi Nurserik Sháripov.