Polıgondaǵy órt: Alataý qalasynda tótenshe jaǵdaı rejımi engizildi

QONAEV. KAZINFORM – Alataý qalasynyń qoqys polıgonyndaǵy iri órtke baılanysty jergilikti aýqymdaǵy tehnogendik sıpattaǵy tótenshe jaǵdaı rejımi engizildi. 

Almaty oblysy ákimdiginiń málimetinshe, bul sheshim Qazaqstan Respýblıkasynyń qoldanystaǵy zańnamasyna sáıkes qabyldandy.

– Órt aýqymdy aýmaqty qamtyǵandyqtan, tótenshe jaǵdaı rejımin engizý qajetti kúshter men quraldardy – órt sóndirýshilerdi, qutqarýshylardy, arnaıy tehnıkany der kezinde jumyldyrýǵa jáne barlyq qyzmettiń jumysyn úılestirýge múmkindik beredi, - dep habarlady oblys ákimdigi. 

Sonymen qatar qabyldanǵan sharalar órt saldaryn joıý jumystaryn jedeldetýge baǵyttalǵan.

– Jaǵdaı turaqty baqylaýǵa alyndy. Turǵyndardyń ómirine esh qaýip joq. Barlyq qyzmet túri kúsheıtilgen rejımde jumys istep jatyr. Órttiń shyǵý sebebin anyqtaý maqsatynda arnaıy tekseris júrgiziledi, - delingen málimdemede. 

Eske salaıyq, buǵan deıin Alataýdaǵy qoqys polıgonyndaǵy órtke baılanysty tótenshe jaǵdaı jarııalanýy múmkin ekenin jazǵanbyz. 

Sondaı-aq polıgonyndaǵy jaǵdaı qazir qandaı ekenin jazǵan edik.