Polıgon 30 shaqyrym jerde: SQO-daǵy Beskól mańyndaǵy ormandarda qoqys úıindileri paıda bolǵan
PETROPAVL. KAZINFORM – Soltústik Qazaqstan oblysy Beskól aýylynyń mańyndaǵy orman alqaptaryna turmystyq qaldyqtar tógilip jatyr.
Orman ishinde úıilgen qoqysta plastık ydystar, paketter, bótelkeler, qurylys materıaldarynyń qaldyqtary jáne ózge de zattar kezdesedi. Keıbir ýchaskelerde qaldyqtar orman jolynyń boıyna, endi birinde aǵashtardyń arasyna tastalǵan.
Aýyl turǵyndarynyń aıtýynsha, jaqyn mańdaǵy orman alqaptarynda qoqys úıindilerin sońǵy ýaqytta jıi kezdestirýge bolady. Turǵyndar munyń bir sebebin qatty turmystyq qaldyqtar polıgonynyń shalǵaı ornalasýymen baılanystyrady.
2025 jyly Báıterek aýyly mańyndaǵy qatty turmystyq qaldyqtar polıgony jabyldy. Bul qoqys orny eldi meken mańynda birneshe jyl buryn zańsyz paıda bolyp, oǵan jaqyn mańdaǵy on shaqty aýyldyń, sonyń ishinde Beskól turǵyndarynyń da turmystyq qaldyqtary tógilgen.
Sol kezde aýyl ákimi zańsyz qoqys ornynyń jabylýyna baılanysty turǵyndarǵa Shahovskoe aýyly mańyndaǵy qatty turmystyq qaldyqtar polıgonyn ýaqytsha paıdalanýdy usynǵan. Beskólden Shahovskoe aýylyna deıingi qashyqtyq shamamen 30 shaqyrym.
Qoqysty qaıda shyǵarýǵa bolady?
Beskól aýyldyq okrýginiń ákimi Baýyrjan Mýsınniń aıtýynsha, eldi mekende turǵyndardyń qatty turmystyq qaldyqtaryn jınaý jáne shyǵarý qyzmeti uıymdastyrylǵan. «Jańa Qyzyljar» JShS-men kelisimge otyryp, konteınerlerdi paıdalanýǵa bolady.
- Beskól aýylynyń turǵyndary qazirgi ýaqytta turmystyq qatty qaldyqtaryn Prıbrejnyı aýyldyq okrýgine qarasty Shahovskoe aýylynda ornalasqan polıgonǵa tapsyra alady. Al aýyl mańyndaǵy orman alqaptarynda qoqystyń jınalýyna jol bermeý úshin turaqty túrde senbilikter ótkizilip, aýmaqtar, onyń ishinde orman jolaqtary sanıtarııalyq tazalaýdan ótkiziledi. Stıhııalyq qoqys úıindilerin anyqtaý jáne joıý jumystary qolda bar múmkindikter men qarjylandyrý aıasynda turaqty júrgiziledi. Qazirgi ýaqytta orman alqabynyń aýmaǵyndaǵy stıhııalyq qoqys úıindilerin joıý jumystaryna arnaıy qarjy qarastyrylmaǵan, - deıdi aýyl ákimi.
Desek te, bıyl Beskól aýmaǵyn sanıtarııalyq jaǵdaıǵa keltirý úshin memlekettik satyp alýlar aıasynda 8,89 mln teńgeden astam qarajat kózdelgen.
Ákimdiktiń málimetinshe, bul qarajat Beskól aýylynyń kósheleri men aýmaǵyndaǵy qoqysty shyǵarýǵa jáne stıhııalyq qaldyq jınalǵan oryndaryn joıýǵa arnalǵan.
Resmı monıtorıngte Beskól boıynsha qoqys orny anyqtalmaǵan
SQO Ekologııa departamenti mamandary Beskól aýylynyń aınalasyndaǵy orman alqaptaryndaǵy qoqys oryndarynyń paıda bolýyna qatysty Kazinform tilshisiniń saýalyna vedomstvoǵa ruqsat etilmegen qoqys úıindileri týraly aqparat nemese shaǵym túspegenin aıtty.
Sonymen qatar bıyl ǵaryshtyq monıtorıng arqyly Beskól aýylynda ruqsat etilmegen qaldyqtardy ornalastyrý oryndary anyqtalmaǵan.
- 2021 jyldan beri oblysta zańsyz qoqys oryndaryn anyqtaý jáne olardyń aldyn alý boıynsha turaqty jumys júrgizilip keledi. Bul úshin ekologtar, polıtsııa jáne jergilikti atqarýshy organdardyń ókilderinen quralǵan mobıldi toptar eldi mekenderdi aralap, tekserý júrgizedi. Alaıda bıyl Beskól aýylynda qaldyqtardy ruqsat etilmegen jerge tastaý oryndary anyqtalmady. Mundaı oryndar anyqtalǵan jaǵdaıda, olardy joıý jáne jaýapty tulǵalardy anyqtap, jaýapqa tartý úshin jergilikti atqarýshy organdar men polıtsııaǵa tıisti shara qoldaný týraly hat joldanady, - deıdi SQO Ekologııa departamentiniń basshysy Talǵat Sabıev.
QR Ekologııalyq kodeksine sáıkes, kommýnaldyq qaldyqtardyń aınalymyna baqylaýdy jergilikti atqarýshy organdar júzege asyrady. Stıhııalyq qoqys úıindilerin joıýdy uıymdastyrý da olardyń quziretine jatady.
Oblysta bıyl 54 zańsyz qoqys orny anyqtalǵan
Ekologııa departamentiniń málimetinshe, 2026 jyly «Qazaqstan Ǵarysh Sapary» UK» AQ-nyń ǵaryshtyq monıtorıngi arqyly oblys aýmaǵynda qoqys tastaıtyn 54 oryn anyqtalǵan. Jergilikti atqarýshy organdardyń málimetine sáıkes, olardyń barlyǵy joıylǵan.
Salystyrmaly túrde, 2025 jyly oblysta 114, al 2024 jyly 171 ruqsat etilmegen qoqys orny anyqtalǵan.
Sonymen qatar, bıyl ruqsat etilmegen qoqys oryndaryn joıý jónindegi talaptardy tıisinshe oryndamaǵany úshin departament eki laýazymdy tulǵany jalpy somasy 97 myń teńgege ákimshilik jaýapkershilikke tartqan. Byltyr mundaı 9 derek tirkelip, olardyń nátıjeleri boıynsha 6 laýazymdy tulǵa jalpy somasy 206 myń teńgege ákimshilik jaýapkershilikke tartyldy.
Al Beskól mańyndaǵy orman alqaptaryndaǵy qoqys oryndary kúnnen kúnge kóbeıip keledi.
Buǵan deıin SQO-da zańsyz qoqys oryndaryna qatysty 40-tan astam laýazymdy tulǵa jazalanǵanyn jazǵan edik. Prokýratýranyń málimetinshe, olardyń barlyǵy drondardyń kómegimen tabylǵan.
