Polıetılen paketterge birden tyıym salý múmkin emes - Ekologııalyq uıymdar qaýymdastyǵy
NUR-SULTAN. QazAqparat – Qazaqstanda polıetılen paketterge birden tyıym salý múmkin emes. Bul týraly Qazaqstan ekologııalyq uıymdary qaýymdastyǵy basqarmasy tóraǵasynyń orynbasary Eldos Abaqanov aıtty, dep habarlaıdy QazAqparat tilshisi.
«Búgingi kúni turmystyq qatty qaldyqtardy qaıta óńdeý Qazaqstandaǵy úlken problemalardyń birine aınalyp otyr. Ony sheshý úshin memleket tarapynan naqty sharalar da qolǵa alynǵan.
Atap aıtqanda, elimizdiń Ekologııalyq kodeksine sáıkes, 2019 jyldyń 1 qańtarynan bastap polıgondarda plastıkterdi kómýge tyıym salynǵan. Munan bólek, osy jyldyń qyrkúıek aıynda bizdiń qaýymdastyq, Ekologııa mınıstrligi jáne «Atameken» palatasy arnaıy memorandýmǵa qol qoıdy. Atalǵan memorandýmǵa sáıkes, 2025 jylǵa deıin kezeń-kezeńimen polıetılen paketterdi saýda núktelerinde paıdalanýǵa tyıym salynbaq. Sonymen qatar endi saýda núktelerinde mundaı paketter tegin berilmeıtin bolady», - dedi ol plastıka qaldyqtaryn jınaý jáne qaıta óńdeý taqyrybyna arnalǵan dóńgelek ústel otyrysy barysynda.
Onyń atap ótýinshe, polıetılen paketterge balama ydyraıtyn bıopaketter shyǵaryp, olardyń baǵasyn teńestirgen jón.
«Ekopaket pen polıetılen paketterdiń baǵasyn birdeı qylsaq, ekologııalyq jaýapkershiligi mol azamattar ekopaketterdi qoldanatyndyǵyna senimimiz mol. Memleket tarapynan qoldaý bolsa, mundaı ekopaketterdi saýda núktelerinde tegin de berýge bolar edi. Jalpy, búginde Qazaqstan boıynsha kúnine 15 mıllıon polıetılen paketi qoldanylady eken. Al bıopaketterdiń úlesi tym az. Kúni keshe ǵana qaǵaz paket shyǵaratyn kásiporyn basshylyǵymen kezdestim. Olar úlken bir saýda jelisimen kelisimge kelip, 1 mln qaǵaz paket satý-satyp alý kelisimshartyn jasasqan eken. Jalpy, búgingi kúni polıeıtlen paketterdi shyǵarýǵa tyıym salý múmkin emes», - dedi Eldar Abaqanov.
