Polıetılen óndiretin kásiporyn Qazaqstannyń JІÓ-ne 1 paıyz túsim qosady

BRıÝSSELЬ. QazAqparat - Avtrııalyq «Borealıs» kompanııasy bolashaqta elimizde turǵyzatyn gazohımııalyq kásiporyn Qazaqstannyń jalpy ishki ónimine qosymsha 1 paıyzdyq túsim ákeletin bolady. Bul týraly Brıýsselde ótip jatqan qazaqstandyq-eýropalyq bıznes-forýmda «Borealıs» kompanııasynyń aǵa vıtse-prezıdenti Espen Ostmo aıtty, dep habarlaıdy «QazAqparat» HAA tilshisi.

Polıetılen óndirisi boıynsha gazdy-hımııalyq jobany Atyraý oblysynda júzege asyrý kózdelgen. Keleshektegi kompanııanyń qýaty jylyna 1,250 mln tonna ónimdi quraıdy.

«Bul joba Qazaqstanda gazdy-hımııalyq ónerkásiptiń qurylýyna múmkindik berip, TMD men Eýropa elderine ónimdi keń aýqymda eksporttaýǵa jol ashady», - dedi Espen Ostmo.

«Borealıs» kompanııasynyń aǵa vıtse-prezıdenti óz sózinde jobaǵa 5 mlrd dollar kóleminde ınvestıtsııa salynǵaly otyrǵanyn, keleshektegi óndiristiń eksporttyq satylymy shamamen 2 mlrd dollarǵa jetetinin aıtyp ótti.

«Qazaqstannyń JІÓ-sine tikeleı túsim shamamen jylyna 1 paıyz bolady. Oǵan qosa otandyq tasymaldaýshylar men ónerkásipten qosymsha túsim keletin bolady», - deıdi E.Ostmo.

«Qazaqstandaǵy iri gaz resýrstaryna súıene otyryp, biz polıetılen óndirisiniń munda bolashaǵy jarqyn ekenin, sonymen birge polıpropılen boıynsha jumysty keńeıtýge bolatynyn boljap otyrmyz», - deıdi «Borealıs» kompanııasynyń aǵa vıtse-prezıdenti Espen Ostmo.

Aıta ketsek, «Borealıs» kompanııasy polıolefın, bazalyq hımıkat men túrli qospalar boıynsha eýropalyq jetekshi óndirýshi bolyp tabylady. Onyń shtab-páteri Avstrııada ornalasqan. 2016 jyldyń qorytyndysy boıynsha kompanııa 7,6 mln eýro paıda tapqan.

Eske sala ketsek, Qazaqstan Prezıdenti Nursultan Nazarbaev Brıýssel qalasyna «Azııa-Eýropa» Forýmynyń (ASEM) 12-shi sammıtine qatysý úshin kelgen bolatyn.

Sondaı-aq, búgin Belgııadaǵy Koroldik saraıynda Qazaqstan Prezıdenti Belgııa Koroli Fılıppen kezdesti.

Sonymen qatar, Brıýssel qalasynda QR Prezıdenti Nursultan Nazarbaev Eýropanyń isker toptar ókilderimen kezdesken.