Polıtsııanyń xalyq arasyndaǵy kómekshileri qansha aqsha tabady
ASTANA. QazAqparat - QR Іshki ister mınıstrligi Ákimshilik polıtsııa komıteti qalmyspen kúres jolynda xalyqpen baılanys ornatý, sonyń ishinde kómek bergen azamattardy yntalandyrý boıynsha esep berdi, dep xabarlaıdy QazAqparat tilshisi.
Komıtet tóraǵasynyń orynbasary Maqsat Baıbolovtyń aıtýynsha, qoǵamdyq tártipti saqtaý salasynda azamattarmen tyǵyz baılanys ornatý máselesine basa nazar aýdarylady. Arnaıy normatıvtik-quqyqtyq aktiler de bar. Zań boıynsha kez kelgen adam ishki ister organdaryna ótinish jazyp, polıtsııanyń kómekshileri qataryna qosyla alady.
«Búginde respýblıka boıynsha jyl saıyn qoǵamdyq tártipti saqtaý sharalaryna 29,5 myń adam atsalysady. Olar ujymdyq qurylymdarǵa birigip, jumys isteıdi. Qazirgi kezde ondaı qurylymdardyń sany 4,5 myńnan asady. Máselen, aýyldy jerlerde «Saqshy» degen qurylymdar bar. Olar mal urlyǵymen kúresedi. Joǵary oqý oryndarynda stýdenttik jasaqtar tártip buzýshylyqpen kúresip, profılaktıkalyq sharalardy atqaryp júredi. Bıyl barlyq qurylymdardyń qatysýymen 1,5 myń qylmystyq is anyqtaldy. Budan bólek, 12,5 myń ákimshilik quqyq buzýshylyq tirkeldi», - dedi M.Baıbolov.
Onyń aıtýynsha, qoǵamdyq tártipti saqtaý salasynda belsendi azamattardy yntalandyrý jaǵy da qarastyrylǵan. Sonyń ishinde alǵys xattar, gramotalar, baǵaly jáne aqshalaı syılyqtar bar. Al Úkimettiń arnaıy qaýlysynda yntalandyrýdyń naqty somasy kórsetilgen. «Máselen, aǵymdaǵy jyldyń birinshi toqsanynda polıtsııaǵa kómekteskeni úshin 955 adam marapattaldy. Solardyń ishinde 765 adam jalpy somasy 4,5 mln teńgeniń (árbireýine 5 888 teńgeden keledi - avt.) aqshalaı syıaqysyn aldy», - dep atap kórsetti M.Baıbolov.
