Polıtsııanyń «Tún kezgen balalar» reıdi barysynda 57 quqyq buzýshylyq anyqtaldy
ASTANA. 28 qańtar. QazAqparat - Astana qalasynyń ІІD kámeletke tolmaǵandar isi jónindegi bóliminiń qyzmetkerleri «Tún kezgen balalar» aldyn alý is-sharalaryn ótkizdi.
Reıdtiń maqsaty - qala kóshelerinde qaraýsyz, qańǵybastyq ómir keship júrgen kámeletke jasy tolmaǵandardy (sonyń ishinde oıyn-saýyq mekemelerinde túngi mezgilde zańdy ókilderinsiz júrgenderdi de) anyqtaý. Bul týraly qalalyq ІІD-niń baspasóz qyzmeti málim etti.
Elordanyń resmı saıtynyń jazýynsha, is-shara barysynda barlyǵy 12 reıd júrgizilip, 57 quqyq buzýshylyq anyqtaldy. Polıtsııa qyzmetkerleri 6 turmysy tómen otbasy men úsh kámeletke jasy tolmaǵan jasóspirimdi esepke aldy. Sonymen qatar, kámeletke tolmaǵandardyń túngi mezgilde oıyn-saýyq oryndarynda bolýynyń 3 faktisi anyqtalyp, sol úshin olardyń 32 zańdy ókili ákimshilik jaýapkershilikke tartyldy. Júrgizilgen reıdter kezinde qaraýsyz qalǵan 7 bala Astana qalasynyń Bilim basqarmasynyń Kámeletke tolmaǵandardy beıimdeý ortalyǵyna ornalastyryldy.
Sonymen qatar, Departamenttiń baspasóz qyzmetiniń derekterine sáıkes, «Tún kezgen balalar» jedel aldyn alý is-sharalary aıasynda 18 jasqa tolmaǵan balalarǵa temeki ónimderin satýdyń 4 deregi anyqtaldy.
Qalalyq ІІD Ákimshilik polıtsııasy basqarmasy «Temeki tútininen arylǵan Qazaqstan» koalıtsııasymen birlesip, turaqty túrde temeki tartýdy shekteýge baǵyttalǵan profılaktıkalyq is-sharalardy júrgizip otyrady.
«Jalpy, jyl basynan beri ýchaskelik polıtsııa ınspektorlary QR «Jekelegen qoǵamdyq oryndarda temeki shegýge tyıym salýdy buzý» ÁQ týraly Kodeksiniń 336-1 baby boıynsha Astanada 207 ákimshilik hattama toltyrdy», - dep habarlady vedomstvodan.
