Polıtsııanyń kıim úlgisinen buryn kásibı biliktiligin arttyrý qajet - Baqyt Ábishev

ASTANA. QazAqparat - Polıtsııanyń kıim úlgisin ózgertkennen góri kásibı biliktiligin arttyrý qajet  edi. Bul týraly búgin «Quqyq qorǵaý organdary qyzmetiniń ashyqtyǵy» atty konferentsııa barysynda  QR Bas prokýratýrasy janyndaǵy Quqyqtyq statıstıka komıteti tóraǵasynyń orynbasary Baqyt Ábishev aıtty, dep habarlaıdy QazAqparat tilshisi.

«Qazirgi ýaqytta qylmystyq protsesti tsıfrlandyrýmen aınalysyp jatyrmyz. Reforma júrgizýdemiz. Eger ony túbegeıli júrgizbesek, ókinishke oraı bizde eshteńe de shyqpaıdy. Bul máselege barynsha tyńǵylyqty daıyndyqpen kelýimiz qajet», - dedi ol.

Onyń aıtýynsha, elimizdiń shalǵaı aýdandaryndaǵy, eldi mekenderindegi polıtsııa bólimderi qyzmetkerleriniń kadrlyq áleýeti óte tómen.

«Sondyqtan qazirgi ýaqytta qarjyny olardyń kıim úlgisine emes, eń birinshi kezekte áleýetterin arttyrýǵa, qaıta oqytýǵa jumsaǵan durys sııaqty. Materıaldyq bazanyń qajettiligi, jalaqylaryn kóterý kerektigi túsinikti. Táýlik boıy jumys isteıtin tergeýshiniń jalaqysy júktemege saı kelmeıdi. Menińshe, bul durys emes. Kelesi 2019 jyl  polıtsııa organdary júıesin reformalaý úshin mańyzdy jyl bolmaq», - dedi Baqyt Ábishev.