Polıtsııanyń artyq ketken kezi de bolǵan shyǵar, biraq olar tártipti saqtaı aldy – Dáýren Abaev

NUR-SULTAN. QazAqparat -QR Aqparat jáne qoǵamdyq damý mınıstri Dáýren Abaev Almaty kóshelerindegi qarsylyq sherýlerine qatysty 1200 shaǵym túskenin aıtty, dep habarlaıdy QazAqparat tilshisi.

Mınıstr Dáýren Abaev saılaý kezinde qaýipsizdik sharalaryn kúsheıtýdiń ne úshin qajet bolǵanyn túsindirdi.

«Saılaýǵa bir kún qalǵanda bas prokýratýra halyqty jappaı jıyndardan saq bolýǵa shaqyrǵan bolatyn. Ondaı eskertý daýys berý naýqanynyń qalypty jaǵdaıda ótýi úshin jasaldy. El úreılenip saılaýǵa barmaı qoıýy múmkin edi», - dedi ol.

Onyń aıtýynsha, Almatydaǵy túngi sherýler kezinde qala turǵyndary polıtsııadan tynyshtyq ornatýdy suraǵan.

«Almatyda túnde jastardan quralǵan kolonna qoǵamdyq tártipti buzdy. Sol aýdandardyń turǵyndarynan ІІM koll ortalyǵyna ǵana 1200 shaǵym túsken. Olar kóshege shyǵýshylardy tynyshtandyrýdy suraǵan. Smartfonnan qarap bıik sózder aıtý ońaı. Al bolyp jatqan jaǵdaıdy óz úıińniń terezesinen kórý múlde bólek. Shyndyǵyn aıtqanda, talaı adam qorqyp qaldy. Polıtsııanyń artyq ketken kezi de bolǵan shyǵar. Biraq olar qoǵamdyq tártipti saqtaı aldy. Kúsh kórsetýlerge jol bermeı, onyń jappaı taralýyn boldyrmady», - dedi Dáýren Abaev.

Aqparat jáne qoǵamdyq damý mınıstri bul turǵyda sheteldik baıqaýshynyń aıtqan sózin eske aldy.

«Eýropalyq baıqaýshylardyń biri Qazaqstanǵa qarsylyq bildirý jáne ony qabyldaý mádenıetin kóteretin kez jetti, degen pikir aıtty. Óte durys pikir. Qasym-Jomart Kemelulynyń keshegi málimdemesi sonyń bastaýy dep oılaımyn», - dedi ol.

Dáýren Abaev jańa Prezıdenttiń ulyqtaý saltanatynda sóılegen sózine de toqtaldy.

«Prezıdent ekonomıkadan bastap saıasatqa deıin árbir qazaqstandyqty alańdatatyn máselelerdi qozǵady. Bizge reformalar qajet. Ulttyq qoǵamdyq senim keńesiniń qurylýy sonyń basty qadamdarynyń biri bolmaq. Bul organ mańyzdy memlekettik sheshimder qabyldaý kezinde pikirler alýandyǵyn qamtamasyz etetinine senimdimin. Jalpy alǵanda, Qasym-Jomart Toqaevtyń keshe aıtqan tapsyrmalary bizdi biriktiretin basty faktor bolýy tıis. Tuńǵysh Prezıdentimizdiń sózi bar.

«Qazaqty syrttan jaý alǵan emes. Qazaqty álsirese alaýyzdyqtan álsiregen, kúsheıse, birlikpen kúsheıgen». Osy sózdi umytpaıyq», - dedi vedomstvo basshysy.