Polıtsııaǵa úıinen aqsha urlandy dep jalǵan aqparat bergen áıeldiń basy bálege qaldy
TALDYQORǴAN.QazAqparat – Almaty oblysynda nesıesin tólegen áıel úıinen aqsha urlanǵanyn aıtyp polıtsııaǵa jalǵan aqparat bergen, - dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, oqıǵa Talǵar aýdanynda bolǵan. 39 jastaǵy áıel tártip saqshylaryna aryzdanyp, úıinen 100 myń teńge joǵalǵandyǵyn jetkizgen. Polıtsııa qyzmeti atalǵan fakti boıynsha is qozǵap, tergeýge kirisken. Biraq sońynda eshqandaıda urlyqtyń bolmaǵany anyqtalǵan. Sebebi, shaǵymdanýshy óziniń túsiniktemesinde shatasyp, oqıǵany ártúrli etip, qubyltyp aıta bastaǵan. Osylaısha aryzdanýshynyń ózi áreketimen qylmystyń bolmaǵanyn ashyp bergen.
«Eshqandaı tonaý faktisiniń bolmaǵanyn, polıtsııaǵa jalǵan aqparat bergenin ol sońynda moıyndady. Anyqtalǵandaı, áıel adam nesıe alǵan. Nesıeni úıdegi qarajatpen tólegen. Biraq onyń nesıe alǵandyǵy jóninde joldasy bilmegen. Ol úıde janjal bolady dep, nesıe tólegen aqshany urlap ketti dep oıdan shyǵarǵan»,- dep málimdedi atalǵan vedomstvonyń baspasóz qyzmeti.
Endi tonaý faktisi boıynsha is toqtatylyp, polıtseıler jalǵan aqparat bergen áıeldiń ústinen QR QK 419 babynyń 2 tarmaǵyna sáıkes is qozǵady. Atalǵan bap talaptary boıynsha kúdikti 4 myń aılyq eseptik kórsetkish kólemine deıin aıyppul tóleıdi nemese 5 jylǵa deıin bas bostandyǵynan aıyrylýy múmkin.
