Polıtsııaǵa tastandy sábıler týraly habarlamaǵan dárigerlerge aıyppul salynbaq

ASTANA. QazAqparat – Medıtsına uıymdarynyń laýazymdy tulǵalary jańa týǵan balany tastap ketý faktisin polıtsııaǵa habarlamasa, onda olar ákimshilik jaýapkershilikke tartylmaq. Іshki ister mınıstrligi Ákimshilik quqyq buzýshylyq týraly kodeksine osyndaı ózgeris engizbek, dep habarlaıdy QazAqparat tilshisi.

«Medıtsınalyq uıymdardyń jáne jetim balalar men ata-analarynyń qamqorlyǵynsyz qalǵan balalarǵa arnalǵan uıymdardyń laýazymdy adamdarynyń jańa týǵan balany tastap ketý, jetim balalar men ata-analarynyń qamqorlyǵynsyz qalǵan balalardyń kelip túsýi jáne jetkizilýi faktisi týraly habarlamaýy - jeke tulǵalarǵa - 5, laýazymdy adamdarǵa - 10 aılyq eseptik kórsetkish mólsherinde aıyppul salynady.

Eger ákimshilik jaza qoldanylyp, keıin 1 jyl ishinde dál sol áreketi qaıtalansa, onda jeke tulǵalarǵa - 20, laýazymdy adamdarǵa - 30 aılyq eseptik kórsetkish mólsherinde aıyppul salynady», - dep jazylǵan jańa redaktsııada.

Qujat «Ashyq» NQA portalynda jarııalandy. Ony talqylaý 23 jeltoqsanǵa deıin jalǵasady.