Polıtsııaǵa para usynǵan júrgizýshi 465 myń teńge aıyppul arqalady

KÓKShETAÝ. QazAqparat – Aqmola oblysynda patrýldik polıtsııa ınspektoryna para usynǵan júrgizýshige qatysty sot úkimi shyqty. Sot er adamǵa 465 myń teńge aıyppul, 15 táýlikke ákimshilik qamaqqa alý jáne ómir boıyna memlekettik qyzmette qyzmet atqarý quqyǵynan, 8 jylǵa kólik basqarý quqynan aıyrý jazalaryn taǵaıyndady, dep habarlaıdy QazAqparat tilshisi oblystyq sottyń baspasóz qyzmetine silteme jasap.

Sotta anyqtalǵandaı, sottalýshy túnde mas kúıinde avtomashınanyń jaryq shamdaryn qospaı, qala ishinde júrgen. Sol sebepti, onyń kóligin patrýldik polıtsııa ınspektorlary toqtatqan.

Er adam jibergen zań buzýshylyqtar úshin jaýapqa tartylatynyn jáne kólik quraldaryn basqarý quqyǵynan aıyrylatynyn túsinip, jasaǵan áreketteri úshin jaýaptan qutylý úshin ınspektorǵa aqsha usynǵan.

«Laýazymdy adamǵa para bergeni úshin qylmystyq jaýapkershilik týraly birneshe ret eskertýlerge qaramastan, sottalýshy patrýldik kóliktiń ishine 31 000 teńge aqsha saldy. Osyǵan baılanysty polıtsııa qyzmetkerleri onyń zańsyz áreketterin tirkep, jedel bólimge habarlady. Qylmystyq is sotqa is júrgizý kelisimmen tústi. Sottalýshy kinásin tolyq moıyndady», -dedi vedomstvodan.

Sot úkimimen er adam laýazymdy adamǵa para bergeni úshin Qylmystyq kodekstiń 367-babynyń 1-bóligi boıynsha kináli dep tanyldy jáne oǵan memlekettik qyzmette qyzmet atqarý quqyǵynan ómir boıyna aıyra otyryp, 465 000 teńge mólsherinde 15 eselengen para somasynda aıyppul taǵaıyndaldy. Alynǵan para somasy memleket kirisine aýdaryldy.

«Budan basqa, er adamǵa qatysty jol erejelerin buzǵany jáne polıtsııa qyzmetkeriniń mas kúıine kýálandyrýdan ótý týraly zańdy talabyn oryndamaǵany úshin ákimshilik quqyq buzýshylyqtar týraly eki hattama jasaldy, olar boıynsha oǵan 15 táýlikke ákimshilik qamaqqa alý, kólik quralyn basqarý quqyǵynan 8 jylǵa aıyrý jáne aıyppul taǵaıyndaldy», - dep tolyqtyrdy vedomstvodan.

Úkim zańdy kúshine engen joq.

Úkimdi jarııa etýge sybaılas jemqorlyqqa jáne onyń kórinisterine tózbeýshilikti qalyptastyrý maqsatynda, polıtsııa qyzmetkerleri shaqyryldy.

Aıta ketsek, budan buryn Aqmola oblysynda laýazymdy tulǵaǵa para bergen ákim sottalǵanyn jazǵan edik.