Polıtsııaǵa para usynǵan júrgizýshi 353 myń teńge aıyppul tóleıdi

KÓKShETAÝ. QazAqparat - Aqmola oblysynda jol-patrýl polıtsııasy batalonynyń qyzmetkerine para bermek bolǵan júrgizýshige 353,5 myń teńge aıyppul salyndy, dep habarlaıdy QazAqparat tilshisi Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń baspasóz qyzmetine silteme jasap.

Vedomstvonyń deregi boıynsha, oqıǵa bıylǵy jyldyń basynda «Astana - Petropavl» tas jolynyń boıyndaǵy «Rýbej-Býrabaı» beketinde oryn alǵan. Jol qozǵalysyn baqylap júrgen jol patrýl polıtsııa batalonynyń qyzmetkerleri Petropavl qalasynyń 28 jastaǵy turǵyny tizgindegen «Mercedes Benz-200» kóligin toqtatqan. Júrgizýshiniń qujattaryn tekserý kezinde polıtseıler QR mindetti saqtandyrý jónindegi zańnamasyna qatysty zańbuzýshylyqty anyqtaǵan. Jaýapkershilikke tartpas úshin júrgizýshi polıtsııa qyzmetkerine 2000 teńge para usynǵan. Alaıda, polıtsııa qyzmetkeri paradan bas tartqan.

«QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqmola oblysy boıynsha departamenti QR ÁQbK 676 babyna (jeke tulǵalardyń zańsyz materıaldyq syıaqy berýi) sáıkes júrgizýshige qatysty ákimshilik hattama toltyryp, ony sot organdarynyń qaraýyna jiberdi.

Ústimizdegi jyldyń 14 naýryzynda Aqmola oblysy Býrabaı aýdandyq sotynyń sheshimimen quqyq buzýshylyq jasaǵan azamat aıypty dep tanylyp, 353 500 teńge mólsherinde aıyppul salyndy», deıdi vedomstvonyń baspasóz hatshysy Jazıra Toqtarqyzy.

Eske sala keteıik, buǵan deıin habarlaǵanymyzdaı 2019 jyldyń 30 qańtarynda «Astana - Petropavl» tas jolynyń boıyndaǵy «Rýbej-Býrabaı» beketinde qujattary durys bolmaǵan júrgizýshi, Petropavl qalasynyń 28 jastaǵy turǵyny jol patrýldik polıtsııa batalonynyń qyzmetkerine para bermek bolady. Alaıda, polıtsııa qyzmetkeri paradan bas tartyp, jemqorlyq qylmysy týraly óziniń basshylyǵy men PD ishki qaýipsizdik basqarmasyna habarlaǵan bolatyn.