Polıtsııaǵa para bergen júrgizýshige qandaı shara qoldanylady
ASTANA. QazAqparat - Pavlodarda jol-patrýldik polıtsııasyna para bermek bolǵan 2 júrgizýshi ustaldy. Bul týraly búgin brıfıng barysynda QR Іshki ister mınıstrliginiń resmı ókili Almas Sadýbaev aıtty, dep habarlaıdy QazAqparat tilshisi.
«Pavlodarda oblystyq ІІD JPQ jol-patrýldik polıtsııasynyń ınspektorlaryna bara bergeni úshin eki júrgizýshi ustaldy. Bireýi - 5 myń, ekinshisi 12 myń teńge bergen. Ekeýi de jol qozǵalysy erejesin buzǵany úshin toqtatylǵan. Olar jaýapkershilikten jaltarý úshin polıtsııa qyzmetkerlerine aqsha usynǵan. Buǵan qosa, laýazymdy tulǵaǵa para bergeni úshin qylmystyq jaýapkershilik qarastyrylǵany týraly eskertýge qaramastan, júrgizýshiler aqshany patrýldik kóliktiń ishine tastap ketken», - dedi Almas Sadýbaev.
Onyń aıtýynsha, qazirgi ýaqytta atalǵan júrgizýshilerge qatysty QR Qylmystyq kodeksiniń para berý baby boıynsha sotqa deıingi tergeý amaldary júrgizilip jatyr. Osy rette Іshki ister mınıstrliginiń resmı ókili laýazymdy tulǵaǵa para bergen azamattar bas bostandyǵynan aıyrylýy múmkindigin eskertti.
A.Sadýbaevtyń atap ótýinshe, jemqorlyq táýekelderdi tómendetý maqsatynda búginde barlyq polıtsııa qyzmetkerleri vıdeotirkegishpen qamtamasyz etilgen. Polıtsııa qyzmetkerleri kúndelikti qyzmetterin aıaqtaǵannan keıin atalǵan vıdeotirkegishtegi materıaldardy tapsyrady. Vıdeomaterıaldar olardyń tikeleı komandırleri men ózindik qaýipsizdik qyzmetkerleri tarapynan tekseriledi.
