Polıtsııaǵa oq atqan almatylyq 15 jylǵa sottaldy
ALMATY. QazAqparat - Almatyda ańshy myltyǵymen úıiniń shyrqyn buzyp, polıtsııaǵa oq atqan buzaqy sottaldy, dep habarlaıdy QazAqparat tilshisi.
37 jastaǵy Djafarov Radıı 2017 jyly 11 jeltoqsanda Á.Moldaǵulova kóshesindegi úıinde mas kúıinde janjal shyǵarǵan.
Qalalyq Polıtsııa departamentiniń baspasóz qyzmetiniń habarlaýynsha, ashýǵa boı aldyrǵan ol úıindegi ańshy myltyǵymen tóbege eki ret atyp, otbasyn, kórshilerin qorqytqan. Sodan soń enesin soqqyǵa jyqqan.
«Boran-188 jol-patrýl polıtsııasynyń ekıpajy kelgende mas buzaqy qarýmen aýlada elirip júrgen. Tártip saqshylary áıelderge qaýipsiz jerge qaraı ketýin ótinedi. Polıtseılerdi kórgen buzaqy mashınaǵa qaraı oqtala bastaıdy. Sol sátte polıtsııa ekıpajy qarýyn tastaýdy, óıtpese tabeldi qarýdy qoldanatyndaryn aıtqan. Sonda buzaqy bir ret oq atyp úlgergen. Abyroı bolǵanda, oq kórshisiniń qorshaýyna tıgen», - dedi polk komandıri Manap Sáttarov.
Sol sátte 24 jastaǵy serjant Abylaıhan Oqas aspanǵa oq atyp eskertý jasaıdy. Bul da buzaqyny toqtatpady.
Polıtsııa serjanty Dáýlet Kenjeǵazy qylmyskerdiń ishinen atyp, ony jaraqattaýǵa májbúr bolady. Shuǵyl shaqyrtylǵan jedel járdem qylmyskerdi aýrýhanaǵa jetkizedi. Ol jazylyp shyqqan soń sot aldynda jaýap berdi.
Ol «mas bolǵandyqtan, kimge oq atyp jatqanymdy kórmedim»dep aqtaldy.
Sot Djafarov Radııdi QR QK 380-babynyń 2-bólimimen aıypty dep tanyp 15 jylǵa bas bostandyǵynan aıyrý týraly sheshim shyǵardy. Keıin apellıatsııalyq kollegııa bul sot úkimin ózgerissiz qaldyrdy.
